“Еҙем” тәбиғәт паркын барып күрәйек!

“Экология” милли проектының төп маҡсаты тәбиғәтте һаҡлап ҡалыу булһа ла, экологик туризмды үҫтереү ҙә мөһим урындарҙың береһен ала, шуға күрә Башҡортостанда ике йүнәлеште лә берләштергән проекттар тормошҡа ашырыла башланы. Шуларҙың береһе – Ғафури райо­нында урынлашҡан “Еҙем” тәбиғәт паркы.
Ошо маҡсатта республиканың Тәбиғәттән файҙаланыу һәм экология министрлығында Башҡорт­остандың махсус һаҡланған тәбиғәт биләмәләре дирекцияһы Ғафури районының турист ин­дустрияһы вәкилдәре менән осрашыу үткәрҙе. Унда “Еҙем” тәбиғәт паркын үҫтереү юлдары ҡаралды.
Тәбиғәт паркы үҙенсәлекле тәбиғәт комплекстарын, һирәк осрай торған йәнлек һәм үҫемлек­тәрҙе һаҡлау, туризм һәм ял ойоштороу маҡсатында бул­ды­рылған. Дөйөм майҙаны 36 мең гектар булған үҙенсәлекле был объект ғилми, тарихи-мәҙәни һәм этнографик әһәмиәткә эйә. Уның биләмәһендә Мәмбәт һәм Ҡуҙ­ғанаҡ тип аталған иң бейек ҡаялар һәм Уралдағы иң оҙон “Еңеү” мәмерйәһе урынлашҡан. Еҙем йылғаһында бөтәһе 147 мәмерйә бар, был – Башҡорт­остан мәмерйәләренең 16 проценты. Бында һирәк осрай торған үҫемлектәр һәм йәнлектәр һаҡ­ланып ҡалған. Йылғаһында Ҡы­ҙыл китапҡа индерелгән ба­лыҡтар йәшәй, үҙенсәлекле ҡоштар төрө бар. Умартасы­лыҡты үҫтереү өсөн бик яҡшы база булдырылған.
Ғафури районындағы был урынға махсус һаҡланған тәбиғәт биләмәһе статусын биреү баш­ланғысы менән Рус география йәмғиәтенең төбәк бүлексәһе сыҡҡан. Проектты финанслау 2019 йылдың 1 ғинуарында “Экология һәм тәбиғәт ресурстары” программаһы сиктәрендә раҫ­ланған. Паркты ойоштороу өсөн 16,6 миллион һум аҡса бүленгән.
– “Еҙем” паркының турист өлөшө үҙ эсенә бер нисә мөһим позицияны алырға тейеш, – ти Республиканың махсус һаҡланған тәбиғәт биләмәләре дирекцияһы директоры Марат Хәсәнов. – Был, тәү сиратта, XVIII – ХIX быуат­тарҙағы кеүек башҡорт ауылы күсермәһен төҙөү. Унда халыҡ кәсептәре, сувенирҙар, тере концерт программалары, милли аш-һыу әҙерләү, мәмерйәгә һәм ҡаяларға турҙар ойоштороу, Еҙем йылғаһы буйлап ағып төшөү ҡаралған. Солоҡсолоҡ, бал табыу өлгөләрен күрһәтеү һәм был тауарҙарҙы туристарға һатыу, турист базалары һәм приюттар төҙөү, йәйәүле маршруттар эшләү бурысы тора. Әлеге йүнәлеш­тәрҙе үҫтереүҙә төп урынды бизнесҡа бирергә кәрәк. Был Рәсәй генә түгел, сит илдәрҙән дә туристарҙы йәлеп итәсәк һәм дөйөм төбәк туризмын үҫтереүгә йоғонто яһаясаҡ.