“Башҡортостан үләндәре” 2050 йылға Марсты яулаясаҡ һәм унда уңыш йыясаҡ

“Экспорт 2050: киләсәк бөгөн” яңыртыу күргәҙмәһендә Волга буйы федераль округы компаниялары 30-ҙан ашыу тауар өлгөһөн тәҡдим итте. Күргәҙмәнең үҙенсәлеге нейро селтәре тәҡдим иткән өлгөләрҙе баһалауҙа: ул теге йәки был тауарҙың киләсәктә нисек ҡулланылыуын билдәләй.

Башҡортостан Хөкүмәтенең матбуғат хеҙмәтенән хәбәр итеүҙәренсә, сара “Йыл экспортсыһы” премияһының округ этабын бүләкләү тантанаһы сиктәрендә уҙҙы. Ул Рәсәй Президентының май указдары буйынса ҡабул ителгән “Халыҡ-ара кооперация һәм экспорт” милли проекты (нацпроекта “Международная кооперация и экспорт”) сиктәрендә тормошҡа ашырыла.

“Башҡортостан Волга буйы федераль округының иң яҡшы экспортерҙары тупланған төп үҙәккә әйләнде. Сарала бөтәһе 12 төбәк, аҙыҡ-түлек, машиналар эшләү, химия, туҡыу, нефть химияһы сәнәғәте, агросәнәғәт комплексы өлкәләренән 60-тан ашыу предприятие ҡатнаша. Башҡортостан компаниялары, мәҫәлән, косметик продукция, аҙыҡ-түлек содаһы, бал, фитопродукция, туңдырма өлгөләрен тәҡдим итте”, – тип һөйләне республиканың тышҡы иҡтисади бәйләнештәр һәм конгресс эшмәкәрлеге министры Маргарита Болычева.

Яһалма интеллект теге йәки был продукцияны киләсәккә үҫтереү варианттарын тәҡдим итә. Мәҫәлән, Башҡортостандың “Косметик фабрикаһы” бренды киләсәктә бер сәғәттә йәшәрергә мөмкинлек бирәсәк. Ә бөгөн Башҡортостандың хуш еҫле үләндәренән, емеш-еләгенән фитотауарҙар сығарған “Башҡортостан үләндәре” 2050 йылға Марсты яулаясаҡ һәм унда уңыш йыясаҡ.

Белгестәр фекеренсә, күргәҙмә Рәсәй компанияларының донъя баҙарындағы киләсәккә саҡырыуҙарға һәм уларҙың үҫешкә әҙер булыуының сағыу миҫалы булып тора.

Фото: foreign.bashkortostan.ru

bashgazet.ru