Милли батырыбыҙҙы данлап

Айыт урта мәктәбендә әленән-әле шиғыр бәйгеләре үтеп тора. Әле башҡорт халҡының милли геройы Салауат Юлаевтың 270-йыллыҡ бағышлап үткәргән шиғыр бәйгеһендә Айыт, Ҡаныҡай, Йылбулаҡтамаҡ мәктәбе уҡыусылары ҡатнашты.

-Башҡорт телендә һөйләшмәһәк тә, һеҙ башҡорт телен дәүләт теле булараҡ өйрәнәһегеҙ. Әйҙәгеҙ, был шиғыр конкурсы дәресте ҡабатлау сараһы булһын, һәммәгеҙгә лә уңыштар теләйем, - тип, мәктәп директоры Гөлнара Наил ҡыҙы Мөхтәсимова шиғриәт бәйгеһенә фатиха бирҙе.

Конкурс шарттары буйынса, шиғыр һөйләүселәр Салауат Юлаев ижадынан әҫәр тәҡдим итергә тейеш ине. Конкурсанттарҙың күбеһе милли батырыбыҙҙың шиғырҙары араһынан “Уралым”, “Тыуған илем” “Яу” шиғырҙарын  һайлағайны. Был аңлашыла ла, тап ошо шиғырҙар изге Тыуған илебеҙгә мәңге бөтмәҫ йыр булып яңғырай, батыр ни тиклем үҙенең Тыуған илен яратыуын, уның менән нисек итеп һоҡланыуын күрһәтә.

Конкурс булғас, әлбиттә, жюри тарафынынан “иң-иңдәр” билдәләнде: III дәрәжә лауреаттары – Ғәйзуллина Зилә  (Йылбулаҡтамаҡ мәктәбе, етәксеһе Кинйәбаева И.Р), Нафиҡов Айназ (Айыт мәктәбе, етәксеһе Мөхтәсимова Э.М.), Халиҡов Линар (Ҡаныҡай мәктәбе, етәксеһе Батраева Д.М.), II дәрәжә – Хәмитова Илүзә (Йылбулаҡтамаҡ мәктәбе, етәксеһе Кинйәбаева И.Р) һәм Халиҡова Лиана (Айыт мәктәбе, етәксеһе Мөхтәсимова Э.М. Ә Айыт мәктәбенең 8-cе класс уҡыусыһы Сәетғәлиев Данияр милли батырыбыҙҙың “Уралым” шиғырын "Уралым" шиғырын оҫта ятлауы менән һоҡландырҙы һәм   I дәрәжә дипломға лайыҡ булды.

Башҡорт теле һәм әҙәбиәте уҡытыусыһы Эльза Марс ҡыҙы әҙерләгән сараны уҡыусылары Алмаз Муллағолов менән Радмила Сәфәрғәлиева милли батырыбыҙҙың биографияһы тураһындағы мәғлүмәт менән тулыландырҙы. Уҡыусыларҙың хор менән “Салауат”, “Шайморатов генерал” кеүек йырҙар башҡарыуы, милли кейемдәрҙә сығыш яһауы рухлы балалар үҫеп килеүен дәлилләй.

Конкурс бер үк ваҡытта тулҡынландырғыс та, әһәмиәтле лә булды. Өфөнән килгән “Йәшлек” гәзитенең хәбәрсеһе Гөлнур Ҡыуатова һәм мең ырыуы төбәк-ара йәмәғәт ойошмаһы рәйесе урынбаҫары Альфред Әхтәм улы Шәймәрҙәнов ижад һөйөүсе балаларға иҫтәлекле бүләктәр һәм дипломдар, тапшырҙы. Киләсәктә лә беҙҙең тәрбиәләнеүселәребеҙ һынатмаҫтар тигән өмөттә ҡалабыҙ!

Ләйлә ҒҮМӘРОВА,

Автор фотолары.