5 декабрь – Ирекмәндәр көнө

Был иң йәш байрамдарҙың береһе булыуға ҡарамаҫтан, ирекмәндәр эшмәкәрлеге йылдан-йыл киңәйә бара. Ирекмәндәр отрядтары төрлө акциялар, шәмбе өмәләре үткәрә, ауыр тормош хәлендә ҡалған оло йәштәгеләргә, приютта йәшәүсе балаларға ярҙам итә, ғөмүмән һәр ваҡыт кемгә лә булһа файҙа килтерерлек эштәр башҡара. Әлеге мәлдә иһә ирекмәндәр махсус хәрби операциялағы яугирҙәргә ҡулдарынан килгәнсә ярҙам итә.

Бөгөн бер кем дә буш ултырмай, бөгөнгө ауыр заманда тормошобоҙҙо яҡтыраҡ, тынысыраҡ булыуын теләп бар тырышлығын һала. Һәр ауылда тиерлек ҡатын-ҡыҙҙар маскировка селтәрҙәре үрә, ҡоро душ әҙерләй, киптерелгән емеш-еләк, борщ һәм төрлө аштар өсөн йәшелсәләр киптерә, сәйҙәр һәм билмән эшләп ебәрә. Бынан тыш. ирекмәндәр госпиталдәрҙә дауаланыусы яугирҙәргә ярҙам йыя. Көндәр һыуыныу сәбәпле уларға хәҙер йылы кейемдәрҙең, дауаланыу сараларының күп кәрәк булыуын һәр кем яҡшы аңлай. Бындай мөһим саранан йәштәр һәм уҡыусылар ҙа ситтә ҡалмай, улар коллектив менән окоп шәмдәре, махсус мендәрҙәр әҙерләй.
Изге эштә ҡатнашыусы һәр кемдең теләге бер – күк йөҙөбөҙ аяҙ, нурлы булһын.  Яу ҡырында йөрөгән ир-егеттәребеҙ иҫән-һау тыуған йорттарына, яҡындары янына әйләнеп ҡайтһын.

Ләйлә ҒҮМӘРОВА,

фотолар асыҡ сығанаҡтарҙан алынды