Башҡортостанда йәш депутаттар Советы барлыҡҡа килде

Башҡортостанда барлыҡ йәш депутаттарҙы берләштергән ойошма — «Башҡортостан Республикаһының йәш депутаттар Советы» (Автоноимялы коммерцияға ҡарамаған) ойошмаһы булдырылды. Ойошма ағзалары — республиканың урындағы үҙидараның вәкиллекле органдарына, шулай уҡ бөтә системалы партияларҙан БР Дәүләт Йыйылышы Ҡоролтайға һайланған 35 йәшкә тиклемге парламентарийҙар.

Эштең өҫтөнлөклө йүнәлештәре иҫәбендә республикала иҡтисади, социаль һәм ижтимағи-сәйәси процестарҙың сифат кимәлен күтәреү, дәүләт йәштәр сәйәсәтен тормошҡа ашырыуға йәлеп итеү иҫәбенә йәштәр менән эшләү, закондар сығарыу башланғыстарын булдырыу инә.

Бөгөнгө көндә Башҡортостанда 8800-ҙән ашыу муниципаль депутат иҫәпләнә. Шуларҙың 636 кешеһе — йәштәр, йәғни 7 проценты. Сағыштырыу өсөн: 2018 йылда улар 1300 кеше булған. Матбуғат конференцияһы спикерҙары билдәләүенсә, дөйөм бурыс — Ҡоролтайҙы һәм Дәүләт думаһын да индереп, бөтә кимәлдәге йәш депутаттар һанын арттырыу, сөнки йәш сәйәсмәндәр — илдең, үҙ төбәгенең, районының йәки ҡалаһының үҫеш процестарында төп ҡатнашыусылар.

Башинформ.