Ғилми иҫбатланды: бал да, үрсем дә күберәк

“БашИнком” ғилми-ғәмәлгә инде­реү предприятиеһындағы микробиологтар эшләгән өр-яңы “ПчелоНормоСила” пробиотик препараты составына бал ҡорттарының ғүмерен оҙайтыуға, уларҙың үрсеүенә, продуктлылығына һәм күстәрҙең уңышлы ҡышлауына ыңғай йоғонто яһаған, юғары һөҙөмтәле ҡулай пробиотиктар төрө һәм штамдар инә. Препарат Баш­ҡортостан дәүләт аграр университеты ғалимдарының юғары баһаһын алды.

Тикшеренеүҙәр күрһәтеүенсә, был пробиотиктар бал ҡорттарының иммунитетын нығытыу йәһәтенән яңы мөмкинлектәр аса, насар тәбиғи мөхит шарттары йоғонтоһон кәметә, умарталыҡтарҙың сифатын яҡшырта.

2018 – 2019 йылдарҙа Башҡорт­остан дәүләт аграр университеты ғалимдары антибиотиктарға алмаш рәүешендә ҡулланылған яңы быуын “ПчелоНормоСила” пробиотиктары ҡушылған аҙыҡ өҫтәмәләренең бал ҡорттарына тәьҫирен ентекле тик­шерҙе.

Һөҙөмтәләр ҡыуандырҙы: препарат күстәрҙең үрсемен – 12,8 процентҡа, балды – 7,5 (16,1 %), балауыҙҙы – 0,04 килограмға һәм рентабеллек кимәлен контроль күрһәткес менән сағыш­тыр­ғанда 9,6 процентҡа арттырған. Шулай уҡ препараттың йәнә бер үҙенсәлеге асыҡланған: тәжрибә үткәрелгән бал ҡорттары төркөмөндә майлы туҡыма үҫеше контроль күрһәткестәрҙән 35 процентҡа юғарыраҡ булған.

2019 йылда Рәсәйҙең төрлө төбәк­тәрендә баллы ауыл хужалығы үҫемлектәрен пестицидтар менән эшкәртеү арҡаһында бал ҡорттары күпләп һәләк булды. Әлегә үҫемлек­селек бындай химикаттарҙан баш тарта алмай, әлбиттә. Уның ҡарауы, пробиотиктар ҡорттарға пестицидтар менән ағыуланыуға ҡаршы торорға ярҙам итә, уларҙың ғүмерен оҙайта. “БашИнком” предприятиеһының өр-яңы биопрепараттары һәм технологиялары бал ҡорттарын һаҡлап ҡалыу һәм үрсетеү йәһәтенән мөһим бурыстарҙы тормошҡа ашырырға булышлыҡ итә.