Дим буйҙары
-17 °С
Болотло
75 лет Победы
Бөтә яңылыҡтар
ИҠТИСАД
20 Октябрь 2021, 08:08

Ҡаҙна нисек тулылана?

Республиканың дөйөм бюджет килеме 2022 йылда - 228,3, 2023 йылда - 226,5, 2024 йылда 238,1 миллиард һум тәшкил итәсәк.

Ҡаҙна нисек тулылана?

19 октябрҙә Премьер-министр Андрей Назаров етәкселегендә Хөкүмәттең сираттағы ултырышы үтте.

Сарала 2021 йылдың туғыҙ айына Башҡортостан бюджетын үтәү һөҙөмтәләре тикшерелде, "Башҡортостан Республикаһының 2022 йылға бюджеты һәм 2023, 2024 йылдарға планлаштырыу осоро тураһында" закон проекты ҡаралды.

Премьер-министр билдәләүенсә, коронавирус инфекцияһының таралыуы ғәҙәти йәшәү барышын үҙгәртте, финанс блогы эшенә һиҙелерлек төҙәтмәләр индерҙе. Әммә Хөкүмәт барлыҡ өҫтөнлөклө бюджет йөкләмәләрен үтәү тотороҡлолоғон һаҡлап ҡала алды.

"Һөҙөмтәле һалым сәйәсәте һәм иҡтисад тотороҡлолоғон яҡшыртыу буйынса ваҡытында күрелгән саралар арҡаһында республика бюджетына һалым һәм һалымға ҡарамаған килемдәр күләме уҙған йылдың ошо осоро менән сағыштырғанда 21,2 процентҡа артҡан. Шул уҡ ваҡытта үҫеш темпы Рәсәйҙең уртаса кимәленән түбән ҡала, шуға күрә беҙгә финанс тотороҡлолоғон һаҡлап ҡалыу мөһим", — тине Андрей Назаров.

Осрашыу барышында республиканың финанс министры Лира Иғтисамова 2021 йылдың туғыҙ айында Башҡортостан бюджетын үтәү һөҙөмтәләре тураһында хәбәр итте.

"2021 йылдың туғыҙ айында төбәктең килем буйынса бюджеты 164 миллиард һум күләмендә үтәлде, 2020 йылдың ошо осоро менән сағыштырғанда 14 миллиард һумға йәки 9,3 процентҡа ашыу. 2019 йылда көрсөккә ҡәҙәрге кимәлгә тиклем үҫеш 22 миллиард һумдан ашыу йәки федераль үҙәктән килгән килем иҫәбенә 16 процент самаһы тәшкил итте", - тине финанс министры Лира Иғтисамова.

Һалым һәм һалымға ҡарамаған килемдәр 107 миллиард һум тәшкил итә, 2019 йылда туғыҙ айлыҡ "көрсөккә тиклемге" кимәлгә өс процентҡа ҡәҙәр кәмей.

Республика бюджетының сығымдары 167 миллиард һум самаһы тәшкил итә. 2019 йылдың ошо уҡ осоро менән сағыштырғанда, үҫеш - 24,5 миллиард һумға ҡәҙәр.

Республиканың бюджет сығымдарының төп өлөшө — 126 миллиард һумдан ашыу (йәки яҡынса 76 процент) - социаль йөкләмәләрҙе үтәүгә йүнәлтелгән.

Пандемия шарттарында эшҡыуарҙарға ярҙам итеү, республикала инвестиция мөхитен яҡшыртыу маҡсатында 1,4 миллиард һум аҡса бүленгән, улар "Бәләкәй һәм урта эшҡыуарлыҡ һәм шәхси эшҡыуарлыҡ башланғыстарына булышлыҡ итеү" милли проектын тормошҡа ашырыуға, муниципаль эшҡыуарлыҡ программаларын берлектә финанслауға, экспортҡа йүнәлтелгән ойошмаларға, фермерҙарға, үҙмәшғүлдәргә ярҙам итеүгә, ауыл кооперацияһын үҫтереүгә йүнәлтелгән. Бынан тыш, инфраструктура ойошмаларының дөйөм суммаһы 4,0 миллиард һумдан ашыу булған активтары барлыҡҡа килә, улар бәләкәйҙәргә дәүләт ярҙамы күрһәтә.

Төбәк проекттары эшмәкәрлегенә 16,4 миллиард һум йәки ҡаралған күләмдән 60 процент бүленгән.

Шулай уҡ ултырыш барышында финанс министры Лира Иғтисамова "Башҡортостан Республикаһының 2022 йылға бюджеты һәм 2023, 2024 йылдарға планлаштырыу осоро тураһында" закон проектын тәҡдим итте.

"Был закон проекты граждандарҙың именлеген нығытыу, бюджет сәйәсәтен нормалләштереү шарттарында иҡтисади үҫеш мөмкинлектәрен арттырыу мәсьәләләрен хәл итеүгә йүнәлтелгән. Күрһәткестәр ковидҡа ҡаршы көрәштән үҫешкә, милли маҡсаттарға, стратегик башланғыстарға күсеүҙе иҫәпкә алып формалаша", — тине ул.

Республиканың дөйөм бюджет килеме 2022 йылда - 228,3, 2023 йылда - 226,5, 2024 йылда 238,1 миллиард һум тәшкил итәсәк.

2022 йылда сығымдар 243,3 миллиард һум күләмендә планлаштырылған.

2023 һәм 2024 йылдарға 226,5 һәм 238,1 миллиард һум тәшкил итәсәк.

2022 йылда Башҡортостандың бюджет дефициты 15 миллиард һум кимәлендә билдәләнә, дефицитты финанслау сығанаҡтары тулы кимәлдә планлаштырыла. Алдағы ике йылға бюджет дефицитһыҙ формалашҡан. Республиканың бюджет сығымдарының иң мөһим йүнәлештәре булып социаль сәйәсәт тора (Башҡортостан Республикаһы мотлаҡ медицина страховкалауының Территориаль фондына күсеүҙе иҫәпкә алып): 2022 һәм 2024 йылдарҙа — 26,8 процент, 2023 йылда — дөйөм сығымдарҙың 28,2 проценты; мәғариф: 2022 йылда — 24,0 процент, 2023 йылда — 25,9 процент, 2024 йылда — 24,1 процент;

иҡтисад: 17,3, 17,6 , 21,2 процент, шул иҫәптән 2022 - 2024 йылдарға эшҡыуарлыҡ өлкәһендә сығымдар, йыл һайын 0,5 процент бәләкәй һәм урта эшҡыуарлыҡҡа субсидия биреү, эшҡыуарлыҡты үҫтереү муниципаль программаларына булышлыҡ итеү, йүнселлеккә ярҙам сараларын тормошҡа ашырыу өсөн; Һаулыҡ һаҡлау: 11,5, 10,6, 9,1 процент.

"Беҙҙең тырышлыҡ аҡса йыйыу өсөн федераль власть органдары менән үҙ-ара әүҙем эш итеүгә йүнәлтелергә тейеш. Социаль әһәмиәткә эйә объекттарҙың, торлаҡтың, юл төҙөү проекттарының һәр ҙур төҙөлөшө федераль йәһәттән финанслау иҫәбенә хупланырға тейеш", — тине Андрей Назаров.

Сығанаҡ: https://bashgazet.ru/articles/i-tisad/2021-10-19/a-na..

Фото: Башҡортостан Хөкүмәте сайты.

Ҡаҙна нисек тулылана?
Автор: