Ниһайәт, көтөп алдыҡ!

Генерал-майор Миңлеғәле Шайморатов хәҙер дивизияһының 78 Советтар Союзы Геройы һәм биш Дан орденының тулы кавалерҙары менән бер рәттән Рәсәй Геройы исемен йөрөтәсәк.

Беҙҙең республикала Шайморатов генералды белмәгән кеше юҡтыр. Ил кимәлендә лә билдәле шәхес ул. Лайыҡлы һәм көтөлгән ғәмәл ине был. Башҡортостанда шәхестең исеме урамдарға бирелгән, һәйкәлдәр бар. Уға арнап йырҙар йырлана, шиғырҙар яҙыла. Беҙҙең Хәрби Дан музейында уның айырым мөйөшө булдырылған. Баш ҡаланың Дим биҫтәһендә тулыһынса легендар дивизияға һәм генерал Шайморатовҡа арналған музей эшләй. Быйыл уны яҡшыртыу, байытыу өсөн аҡса бүленде. Айырым зал булдырыу күҙаллана. Еңеү байрамына райондарҙың муниципаль музейҙарында генерал-майорға һәм дивизияға арналған экспозициялар асыласаҡ.

Былтыр Миңлеғәле Шайморатовтың тыуыуына 120 йыл тулыуҙы киң билдәләнек. Ҡырмыҫҡалы районында ҙур реконструкция ойошторҙоҡ. Бөгөн шәхесебеҙҙең ошо оло исемгә лайыҡ булыуы - бөтөн Башҡортостан халҡы өсөн байрам!

фото: pobedarf.ru