“Киләсәккә лифт” мәктәбе асыла

6 мартта Өфөлә “Киләсәккә лифт” түләүһеҙ һанлы күнекмәләр мәктәбенә балаларҙы ҡабул итә башлайҙар.

Бындай уҡыу йорттарында 13–17 йәшлектәр өс йыл дауамында иҡтисад үҫешенә ныҡлы йоғонто яһаған һанлы технологиялар, программалау һәм микроэлектроника өлкәһендә бушлай өҫтәмә белем аласаҡ. Проекттың инициаторы – “Система” хәйриә фонды Башҡортостан Хөкүмәте һәм “БЭСК” йәмғиәте ярҙамында.

“Киләсәккә лифт. Мәктәп” Рәсәй төбәктәрендә тормошҡа ашырылған мәктәптә өҫтәмә белем биреүҙең тәүге селтәрле программаһын тәшкил итә. Уға ҡушылыу өсөн проекттың сайтындағы теркәлеү формаһын тултырырға һәм уҡыусының дөйөм өлгәше тураһында мәғлүмәт, нигеҙләү хаты ебәрәргә кәрәк. Курс 300 уҡыусыға иҫәпләнә. Тәүге төркөмгә эләгеү өсөн 23 мартҡа тиклем ғариза биреү шарт (http://bf.sistema.ru/school/). Дәрестәр көнүҙәк технологияларҙы яҡшы белгән, проектта ҡатнашыу өсөн махсус әҙерлек үткән тәжрибәле уҡытыусылар етәкселегендә уҙғарыла. Курсты тамамлаған балалар Python программалау телен үҙләштереп, микроэлектроника өлкәһендәге күнекмәләрҙе үҙләштерәсәк. Һанлы технологиялар мәктәбен тамамлағандар “Киләсәккә лифт. Академия” тип аталған киләһе баҫҡысҡа күтәрелеп, төп вуздарға ингәндә өҫтөнлөккә эйә була ала.

“Киләсәккә лифт. Мәктәп” Өфөнөң Рихард Зорге урамындағы 50-се йортта урынлашҡан Айырым фәндәр тәрән өйрәнелгән 31-се мәктәптә һәм Нежинск урамында 13-сө йорттағы лицей-интернатта асыла.

Фото: yandex.ru