Ни өсөн сабыйҙы 40 көн кешегә күрһәтергә ярамай?

Бала тыуғандан һуң беренсе 40 көнөндә сит кешеләргә күрһәтеүҙе тыйыуға килгәндә, быға бер нисә аңлатма бар. Фәнни күҙлектән ҡарағанда, был осорҙа яңы тормошҡа өйрәнеп, адаптация осорон үтеп өлгөрмәгән бала организмын эмоциональ, психик һәм инфекциялар-бактериялар тәьҫиренән һаҡларға кәрәк. Белгестәр фекеренсә, 40 көн бының өсөн етерлек буласаҡ.

Ә инде ышаныуҙарға килгәндә, тәүге 40 көндә балаға күҙ тейеү тигән нәмә бар. Ул әле яман күҙҙәргә, насар энергетикаға ҡаршы тора алмай. Шуға ла ауырып, көйһөҙләнеп китеүе бик ихтимал.

Һүҙ уңайынан, 40 һаны көслө әһәмиәткә эйә. Боронғолар бала тәнендә йәне нығынһын өсөн нәҡ шул тиклем ваҡыт кәрәк тип иҫәпләгән. Шуға күрә сабыйҙы һаҡлап, ҡурсалап, уға нығынырға ваҡыт биргәндәр. 40 көн эсендә балаға исем ҡушыу ҙа – беҙҙең халҡыбыҙҙың матур йолаһы.

"Ҡыҙыл таң" сайтынан.