Өфөлә ер убылған

Ғәҙәттән тыш ваҡиға тураһында ҡотҡарыусылар сәғәт төнгө өс тирәһендә хәбәр ала. Шунда уҡ ваҡиға урынына Өфөнөң Граждандарҙы яҡлау идаралығы, ЮХХДИ, Ашығыс ярҙам хеҙмәттәре йүнәлә.

“Автомобиль соҡорҙан сығарылып, эвакуацияланды. Зыян күреүселәр юҡ. Ваҡиға сәбәптәре асыҡлана. "СУРСИС" идаралығы юл участкаһын тәртипкә килтерәсәк”, - тип хәбәр иттеләр ҡала хакимиәтенән.

Башҡортостан дәүләт телерадиокомпанияһы журналистары хәбәр итеүенсә, такси водителе Павел Демин нимә булғанын тиҙ генә аңламаған. Машина соҡорға әкрен генә ҡолаған. Көслө ағым автомобилдән сығырға ирек бирмәгән. ЮХХДИ хеҙмәткәрҙәре автомобилдең артҡы ишеген асып, водителде сығарған. Артабан инде еңел машинаны соҡор тотҡононан сығарыу эштәре башҡарылған.

Фото: социаль селтәрҙәрҙән.

bash.rbsmi.ru