Милләт әсәләре билдәләнде

Бөтә Рәсәй төбәк конкурсының төп бурысы — ҡатын-ҡыҙҙар берләшмәһенең ижтимағи әһәмиәтле эшмәкәрлеген баһалау, ҡатын-ҡыҙ-әсә статусын күтәреү, Тыуған илебеҙ яҙмышында ҡатын-ҡыҙҙарҙың ижтимағи һәм сәйәси ролен әүҙемләштереү. Конкурста  Башҡортостандан һәи Рәсәйҙең башҡа төбәктәренән 500-ҙән ашыу ҡатын-ҡыҙ ҡатнашҡан. Уларҙың иң яҡшылары бүләкләү тантанаһына саҡырылған.

Еңеүселәр түбәндәге номинациялар буйынса билдәләнгән:

“Милләт әсәһе” – уңышлы һәм өлгөлө балалар тәрбиәләгән күп балалы әсәләр араһында билдәле ғалимдар, етәкселәр, спортсылар, йәмәғәт һәм сәйәси эшмәкәрҙәр; шулай уҡ МХО яугирҙәрен һәм Рәсәй геройҙарын тәрбиәләгән әсәләр;

“Ирекмән” – МХО-ла ҡатнашыусыларға гуманитар ярҙам йыйыу буйынса ирекмәндәр хәрәкәтендә әүҙем ҡатнашыусылар;

“Оҫтабикә” – халыҡ кәсептәрен һәм һөнәрҙәрен пропагандалаусы ҡатын-ҡыҙҙар араһында;

"Ағинәй" - йәмәғәт эштәрендә әүҙем булған, махсус хәрби операцияла ҡатнашыусыларға ярҙам иткән һәм халыҡ араһында ихтирам менән файҙаланған 60 йәштән өлкән ҡатын-ҡыҙҙар араһында. 

Беҙҙең райондың гүзәл заттары - Люциә Шәмсетдин ҡыҙы Мырҙаханова "Ағинәй" (Аҙнай) Әхмәтова Галина Федоровна "Оҫтабикә" (Бишбүләк), Попова Ирина Викторовна – "Педагог" (Каменка) номинацияһында билдәләнеп, был саранан сағыу тәҫораттар менән ҡайтты.  Рәсәй атайҙары" исеменән "Ватанды Һаҡлаусылар" фондының социаль координаторы Хисаметдинова Гүзәлиә Әхмәҙетдин ҡыҙы иһә айырым Рәхмәт хаты менән бүләкләнгән.

Аҙнай ауылында тыуып-үҫкән Люциә Шәмсетдин ҡыҙы 83 йәштә булыуына ҡарамаҫтан, һәр яҡлап әүҙем тормош алып бара. Үҙенә килешеп торған милли кейемдәре менән ул йыш ҡына концерттарҙа сығыш яһай: тыҡылдата баҫып бейей йәки боронғо аһәңле йырҙарҙы һуҙа.  Һәр яҡлап әүҙем Люция апайҙы МХО-лағыларға маскировка селтәрҙәре үреүселәр янында ла күрергә була, ул таҫмаларҙы киҫеп тора, шулай уҡ сәй табыны әҙерләп ҡатын-ҡыҙҙарҙы һыйлай. Ауылда уҙғарылған төрлө өмәләрҙән дә ситтә ҡалмай. 

Фото: Берҙәм Рәсәй сайты