Ике уҡыусы баланы үлтергәндәр

Кемеров өлкәһендә 10 йәшлек ике ҡыҙҙың 6 сентябрь көндө мәктәпкә китеп юҡҡа сығыуҙары асыҡлана. Өйҙәренә ҡайтмаған балаларҙы эҙләй башлайҙар. Ҡыҙғанысҡа ҡаршы, балаларҙы үле килеш тапҡандар.

Хоҡуҡ һаҡлаусылар балаларҙы үлтереүҙә ғәйеплене видео күҙәтеү камералары аша асыҡлаған. Үҙен “Дядя Витя” тип таныштырған ир, ике балаға магазиндан тәмлекәстәр һатып алып биргән булған.

Тәүҙә юғалған ике баланы билдәһеҙ ир менән туҡталышта торған мәлдә видео күҙәтеү яҙҙырып алған. Ә һуңғы тапҡыр балаларҙы магазиндағы камера төшөрөп алған, унда ла балалар билдәһеҙ ир кеше менән булған. Магазинда булған ваҡыттан һуң балалар юҡҡа сыға, һуңынан ғына ҡыҙҙарҙың үле кәүҙәләрен шәхси йорттарҙың береһендә табалар.

Опертив органдар ғәйеплене асыҡлап ҡулға алғандан, ул әлегә тиклем педофилия өсөн төрмәлә ун йыл ултырып сыҡҡан 41 йәшлек ир булып сыға.

Һуңынан ҡалала йәшәүсе ата-әсәләрҙең береһе был ике ҡыҙ менән үҙенең улы ла уйнап йөрөгәне тураһында хәбәр итә. Ҡыҙҙар малайҙы бергә уйнарға саҡыра, оҙаҡ ҡына уйнағандан һуң малайға ниҙер оҡшамай һәм ул ҡайтып киткән. Ҡыҙҙар малайҙы “Дядя Витя” менән таныштырып өлгөргән булған.

ashkadar.com