Ниңә ул бик һуң асыҡлана?

Республика клиник онкодиспансерының баш табибы Руслан Солтанов сираттаҡы кәңәшмәлә балалар рагын һуңғы 3-се һәм 4-се стадияла ғына асыҡлаған республика педиатрия клиникаларын һанап сыҡҡан.

Мәҫәлән, Борай, Мәләүез, Миәкә, Туймазы һәм Саҡмағош райондары дауаханаларынында был күрһәткес 100 процент тәшкил иткән. Был инде балала онкология тапҡанда, ул 3-се йәки 4-се стадияла булыуын аңлата.

Дүртөйлө районында һәм Нефтекама ҡалаһында ауырыуҙы 66,7 процент осраҡта ваҡытында күрмәгәндәр, ә Ҡалтасы районында, Сибай һәм Өфөлә (21-се дауаханала) был күрһәткес - 50 процент.

Балалар онкологияһын һуң асыҡлау Салауат, Белорет һәм Күгәрсен райондарында ла күҙәтелә. Иң түбән күрһәткес — Өфөнөң 2-се һәм 5-се балалар поликлиникаларында.

"Ҡыҙыл таң" гәзитенән.