Ҡамырға төрөлгән өйрәк

Өйрәкте таҡтаға һалып, итен бүлгесләмәй генә һөйәгенән айырырға. Ҡош итенең майы бөтә ергә лә тигеҙ бүленһен өсөн, һимеҙ урындарын ваҡ ҡына итеп ҡырҡҡыслап, төрлө ергә ҡыҫтырырға. Бынан һуң итте тоҙлап, борослап, полиэтилен менән ҡапларға ла бер сәғәт тоторға.

Ошо ваҡытта ҡара емеште йыуып, саҡ ҡына ебетергә кәрәк. Бынан һуң итте ҡара емеш менән аралаштырып, рулет итеп төрөргә лә, теш таҙартҡыс таяҡсалар менән сәнсеп тоташтырып, мейескә ҡуйырға кәрәк. Бешкән ваҡытта сыҡҡан майҙы өйрәктең өҫтөнә ҡойорға. Әҙер булғас, итте һыуытырға.

Дүрткел итеп ҡатлаулы ҡамыр йәйелә. Ҡамырҙың тап уртаһына өйрәкте һалып, ситтә ҡалған ҡамырҙы ҡырҡҡыслап сығырға кәрәк. Һуңынан буйлап ҡырҡылған ҡамыр өлөштәре бер-бер артлы үрелеп, өйрәк өҫтөнә теҙелә. Рулетты йомортҡа менән буяп, мейескә ҡуябыҙ.

“Башҡортостан календары”нан.