Путин, Трамп һәм Меркель иртән нимә ашайҙар?

Рәсәй Президенты Владимир Путиндың, АКШ лидеры Дональд Трамптың һәм Германия канцлеры Ангела Меркелдың, шулай уҡ Испания премьер-министры Педро Санчестың иртән нимә ашауы билдәле булған.

Владимир Путин ғәҙәттә һимеҙ булмаған ит, майлы һәм майһыҙ сортлы балыҡ, йәшелсә-емештәр, бутҡа һәм йомортҡа менән туҡлана. Президенттың рационында яҡшы эшкәртелгән ризыҡтар юҡ. Иртәнге ашы, ҡағиҙә булараҡ, сей бүҙәнә йомортҡаһынан йәки ябай йомортҡа тәбәһенән, еләк-емештәрҙән, Алтай балы ҡушылған ҡарабойҙай бутҡаһынан тора.

Президенттың киске ашы ла еңелсә генә – башлыса һөт һәм һөт ризыҡтары. Яҡшы формала булырға Путинға спорт – йөҙөү, көрәш менән мауығыу, саңғыла йөрөү, хоккей ярҙам итә, тип хәбәр итә El Confidencial.

АКШ президенты фаст-фуд ярата, тиҙәр: гамбургерҙар, сэндвичтар, бекон, соус, пицца, ҡамыр ризыҡтары.

Ангела ханым бәрәңге иҙмәһе һәм сосискаларға, сырлы фондюға һәм һыраға өҫтөнлөк бирә.

Испания премьер-министры Педро Санчес йәшелсә-емештәр, салаттар, ит, балыҡ ярата. Санчес әфәнде күп һыу эсә, аҙнаһына өс тапҡыр спорт менән шөғөлләнә.