Пенсия алды йәшендәгеләр, һеҙҙең өсөн!

Пенсия йәше алдындағы граждандарҙың мөлкәт һалымдары буйынса ташламаға хоҡуғы бар. Аныҡлап әйткәндә, һүҙ – алты сутый ергә һалым хаҡында. Бынан тыш, ошо йәштәгеләр бер фатирға йәки өйгә, башҡа күсемһеҙ милек объектына һалым түләүҙә лә ташламанан файҙалана ала. Ә быға тиклем бынан хаҡлы ялға сыҡҡас ҡына файҙалана алалар ине.

Шуныһы яҡшы: үрҙә әйтелгән һалымға ташлама өсөн ғариза яҙыу кәрәкмәй. Әммә шул уҡ ваҡытта һалым органдарында ҡайһы бер айырым һалым түләүселәрҙең кәрәкле мәғлүмәттәренең булмауы ихтимал. Шуға ошо хоҡуҡҡа эйә булғандарға быйыл 1 июнгә тиклем ташламаға хоҡуғының барлығы тураһында ғариза яҙыу зарур. Уны үҙегеҙ һалым органына тапшыра йәки күп функциялы үҙәк аша эшләй алаһығыҙ. Рәсәй Федераль һалым хеҙмәте сайтында шәхси кабинет аша электрон почтаға ебәрергә мөмкин.

Ғаризала пенсия алдындағы йәшегеҙҙе раҫлаған документтың реквизиттарын күрһәтергә онотмағыҙ. Был – Пенсия фонды биргән хаҡлы ялға сығыу алдындағы йәшегеҙҙе раҫлаған белешмә. Уның өсөн Рәсәй Пенсия фондының йәшәү урыны буйынса бүлексәһенә, эш урынында йәки күп фунциялы үҙәккә шәхсән мөрәжәғәт итергә мөмкин. Рәсәй Пенсия фондының Башҡортостан буйынса бүлексәһенең www.pfrf.ru сайтында ла электрон төр мәғлүмәт алырға була.

Фото: nalog.ru.