Радий Хәбиров шифахана-курорт ойошмаларын үҫтереү буйынса эш төркөмө булдырҙы

Был турала ул хөкүмәттәге оператив кәңәшмәлә хәбәр итте. Эш төркөмө етәксеһе – республика Башлығы хакимиәте етәксеһе урынбаҫары Ринат Бәширов. «Ни өсөн быны эшләйбеҙ? Башҡортостан шифаханалары – ҡеүәтле һауыҡтырыу учреждениелары комплексы, илдә иң мөһимдәренең береһе. Хәлде тикшергәс, республиканың рекреацион ҡеүәтенә дәүләт идараһын юғалта барыуыбыҙҙы аңланыҡ, — тине республика етәксеһе. — Шөғөлләнергә кәрәк булған төп проблема: күптәр барырға теләй, ләкин юлламаларҙың ҡиммәтлеге кешеләргә тейешенсә дауаланырға мөмкинлек бирмәй. Юллама хаҡын түләй алмаған кешеләр һауыҡтырыу хеҙмәттәре менән файҙалана алһын өсөн махсус механизм уйларға кәрәк», — тип йөкләмә бирҙе Радий Хәбиров эш төркөмөнә. Билдәле булыуынса, төркөм, юлламалар һатыуҙы һәм хаҡ ҡуйыуҙы контролдә тотоп, аҙна һайын эшләргә тейеш.

фото/Pixabay