Эремсек билмәне

Эслек өсөн: йомортҡа, 2 ҡалаҡ ҡаймаҡ, тәменә ҡарап тоҙ.

Ҡамыр өсөн:

1 стакан он, 2 йомортҡа, 2 ҡалаҡ һурпа, тәменән ҡарап тоҙ.

Эремсекте ит турағыс йәки ҡырғыс аша үткәрәбеҙ. Йомортҡа, ҡаймаҡ, тоҙ һалып, эслек әҙерләйбеҙ. Аҙаҡ туҡмасҡа әҙерләгән кеүек ҡамыр баҫабыҙ. Туҡмас йәймәһенә ҡарағанда ҡалыныраҡ итеп йәйергә кәрәк, аҙаҡ 6-7 сантиметр диаметрҙағы түңәрәктәр яһайбыҙ.

Әҙер эремсек эслеген түңәрәктәр уртаһына һалып, түңәрәктәрҙе икегә бөкләп ситтәрен йәбештерәбеҙ.

Һуңында эремсек билмәндәрен ҡайнап торған тоҙло һыуға төшөрөп бешереп алабыҙ. Табынға ҡайнар килеш һурпаһы менән бирәбеҙ. Әҙер ризыҡҡа йәшел һуған һәм ҡаймаҡ та ҡушһаң, ифрат тәмле була.