Спорт өсөн мөмкинлектәр артасаҡ

Башҡортостан Башлығы Радий Хәбиров Көрәш һарайының төҙөлөш майҙансығында булды. Эш раҫланған графикка ярашлы бара. Төҙөүселәр стеналар, плитәләр һәм колонналар , металл конструкциялар ҡора, кирбестән бүлкәләр һала башлаған, тип хәбәр итә Башҡортостан Башлығының матбуғат хеҙмәте.

Бинаның дөйөм майҙаны – 28 мең квадрат метр. Уртаһында спорт комплексын һәм спорт көрәше мәктәбен, 3,5 мең урынлыҡ амфитеатр менән универсаль зал, музей асыу ҡарала. Яңы спорт учреждениеһында халыҡ-ара, ил кимәлендә көрәш һәм башҡа спорт төрҙәре буйынса ярыштар үткәреү планлаштырыла.

«Һәр квадрат метрҙы һөҙөмтәле файҙаланыу өсөн үҙәкте мөмкин тиклем функциональ итергә тырыштыҡ. Бында спа-комплекс, бассейн була. Ә бина эргәһендә халыҡҡа ял итеү өсөн төҙөкләндерелгән йәмәғәт киңлеге булдырыла. Республикала «Өфө-Арена»нан ҡала икенсе ҙур зал төҙөйбөҙ. Шуға күрә Көрәш һарайы мәҙәни саралар майҙансығына ла әүерелер тип уйлайым. Дөйөм алғанда, эш яҡшытемптар менән бара», - тип билдәләне Радий Хәбиров.

Көрәш һарайы – Өфөнөң 450 йыллығына арналған юбилей объекттарының береһе. «Башинформ» хәбәр иткәнсә, Башҡортостан Башлығы 2019 йылда объекттың нигеҙ ташына ваҡыт капсулаһын һалып, төҙөлөшкә старт биргәйне.

https://www.bashinform.ru