Беҙгә Башҡорт дәүләт педагогия университеты студенттары килде

Мифтахетдин Аҡмулла исемен йөрөткән Башҡорт дәүләт педагогия университетында  бөйөк мәғрифәтсе, шағир Мифтахетдин Аҡмулланың ижадын, тормошон өйрәнеүгә ҙур иғтибар бирелә.

Был юлы Бишбүләк районындағы осрашыуға ла уҡытыусылар һәм уҡыусылар коллективы дәррәү юлланды.

Саралар Бишбүләк ауылында урынлашҡан 1-се урта мәктәбендә башланып китте. Унда Аҡмулланың ижадына һәм тормошона арналған стенд асыу ҙа иҫтәлекле булды. Башҡортостандың һәм Рәсәйҙең Яҙыусылар Союзы ағзаһы, Мифтахетдин Аҡмулланың ижадын өйрәнеүгә ҙур көс һалған шәхес Фәнис Янышев үҙенең сығышында шағирҙың әсәһенең ошо райондың Айыт ауылынан булыуын билдәләне һәм бөгөн ошо ауылды күреү маҡсатын да әйтте.

Райондың иң ҙур мәктәптәренең береһе – 1-се мәктәп уҡыусылары менән осрашыу ҙа фәһемле булды. Мең ырыуы башҡорттарының төбәк-ара йәмәғәт ойошмаһы рәйесе урынбаҫары Альфред Шәймәрҙәнов мәктәп директоры Урал Ғатауллинға башҡорт теле һәм әҙәбиәте үҫешенә ҙур өлөш индергәне өсөн Ҡәнзәфәр бей миҙалын тапшырҙы. БДПУ-ның башҡорт теле һәм әҙәбиәте кафедраһының өлкән уҡытыусыһы Айтуған Куланчин юғары уҡыу йортонда ниндәй һөнәрҙәргә уҡыу мөмкинлектәре тураһында уҡыусыларға файҙалы мәғлүмәттәр еткерҙе.

Айыт ауылындағы осрашыу ҙа бай күңел тәьҫораттары ҡалдырҙы. Ауыл мәктәбендә башҡорт телен үҫтереү йәһәтенән ҙур эштәр алып барыуын күрҙек, шул уҡ ваҡытта бында илһөйәрлек тәрбиәһе лә көслө ҡуйылған. Мәктәп үҙенең шәхестәре менән ғорурлана. Стендтарҙа улар тураһында бай мәғлүмәттәр тупланған. Улар араһында әлеге сараны ойоштороуға ҙур көс һалған оставкалағы полиция подполковнигы Альфред Шәймәрҙәнов та бар ине.

БДПУ студенттары һәм уҡыусылары Дүсән ауылындағы билдәле дипломат Кәрим Хәкимов музейында ла булып, уның эшмәкәрлеге, тормош юлы тураһында ла файҙалы мәғлүмәт алды.

Автор фотолары.