Берк Эфе, Юсро һәм Гөлфиә

Йыл башынан Башҡортостанда яңы тыуған сабыйҙарҙың иң популяр һәм һирәк осраған исемдәре билдәле булды. «ЗАГС реестры» сайтында хәбәр ителеүенсә, малайҙарға һирәк ҡушылған исемдәр: Ахмадхон, Денислам, Берк Эфе, Сайфуллох, Матвей-Мэттью. Ә ҡыҙҙар араһында Гөлфиә, Азель, Юсро, Диляна, Эммануэла исемдәре бик аҙ.

Республикала Әминә (368 ҡыҙ), София (345), Арина (335), Ева (331) һәм Эмилия (329) кеүек ҡатын-ҡыҙ исемдәре популяр. Малайҙарға йышыраҡ Әмир (460), Марк (334), Тимур (328), Мирон һәм Матвей (322-шәр) тип ҡушҡандар.

«Башинформ» хәбәр иткәнсә, октябрь башында ҡыҙҙарға - Наоми, Иман, Алика, Миша, Флүзә, малайҙарға иһә Северин, Бакир, Валентин, Нейтан, Мансаф тигән үҙенсәлекле исемдәр һайлағандар.

https://www.bashinform.ru