Дауылда теләһә ҡайһы ышыҡ та яҡшы...

Бер ваҡыт бай сауҙагәр улына донъя күрһәтмәксе булып, алыҫ юлға алып сыҡҡан. Сәйәхәт ваҡытында былар яҡшы ҡунаҡханаларҙа туҡталған.

Сауҙагәр улын шулай өйрәткән: малай үҙен әфәнде итеп тойорға тейеш. Шул ваҡытта уға уңайлы бүлмә лә бирәсәктәр, яҡшы ат та әҙерләйәсәктәр, улар йөҙгән карапҡа ла гавандең һәйбәт урынын ҡалдырасаҡтар.

Ә бер көндө юлда уларҙың егелгән пар атының береһе ҡазаланған. Ямғыр яуып ебәргән, тиҙ генә ҡараңғы ла төшкән. Аталы-уллы яҡындағы ауылға йәйәүләп барырға мәжбүр булған. Ҡунаҡхана-фәләнһеҙ генә бәләкәй ауылда былар өйҙәрҙең ишеген туҡылдатып, ҡунырға һораған. Береһе лә асмаған...

Бына улар һуңғы йорт алдында баҫып тора. Бәләкәй генә бер ыҙба уныһы. Әләм-һәләм генә кейенгән ҡарсыҡ сығып уҡ ҡаршы алған. Сауҙагәр малайы өйҙөң ҡарайған стеналарын, емерелеп төшөргә торған түшәмен күреп, атаһына бында ҡалмауҙарын үтенгән.

– Дауылда һәр ышыҡ та яҡшы, – тигән бай. Һәм хужабикәгә баҡыр аҡса һонған. Уныһы тәңкәне күкрәгенә баҫып ҡыуанған.

– Баҡырҙы алтындай күреп шатлана бит әле, – тип шыбырлаған атаһына йәш үҫмер.

– Дауылда теләһә ниндәй ышыҡ та яҡшы булған кеүек, фәҡирлектә һәр ҡайһы тәңкә лә алтын ул, улым, – тигән сауҙагәр.

 Айсын АҠБУЛАТОВА.

https://ye102.ru