Ярыш сәмле барҙы

“Айыҡ ауыл” конкурсы сиктәрендә ойошторолған саралар районда киң таралыу ала. Уға арналған байрам Шишмә районының Түбәнге  Хәжәт ауылында ла үтте. 

3 февралдә Мең ырыуы йәмәғәт ойошмаһы тарафынан ойошторолған сарала 50 йәште үткән ҡатын-ҡыҙҙар  ҡатнашты. Хоккей - ысын ирҙәр уйыны, тиһәләр ҙә, һуңғы йылдарҙа ул ҡатын-ҡыҙҙар араһында ла популярлыҡ яулай. Был көндә лә улар быйма кейеп, хоккей уйнау өсөн боҙ майҙансығына сыҡты. Благовар, Бишбүләк Шишмә, Өфө районы командалары үҙ-ара көс һынашты. Михайловка ауыл Советының "Етеҙ быймалар" командаһы сағыу формалары менән айырылып тора ине. Әйтергә кәрәк, уйын көсөргәнешле, бик шәп тиҙлектә, мауыҡтырғыс булды. Беренсе урынға уйын хужалары - Шишмәләр сыҡһа, Бишбүләктәр Благовар командаһы менән көс һынашып, 2-се урын алды.   «Уңғандар» (Благовар) 2-cе һәм «Нурлылар» (Өфө районы) 3-cө урын менән билдәләнде.

Был сараға мәртәбәле ҡунаҡтар ҙа килгәйне: Бөтә донъя башҡорттары ҡоролтайы Башҡарма комитеты рәйесе Юлдаш Мөхәмәт улы Йосопов, Шишмә районы хәкимиәте башлығы Ильнур Фауғәт улы Үрәзмәтов, Башкортостан Республикаһы Ҡоролтай Дәүләт Йыйылышы Шамил Римзил улы Вәлиев,  Мең-ырыуы төбәк-ара йәмәғәт ойошмаһы рәйесе Әхнәф Дәүләтйәр улы Тимербулатов һ.б. Барлыҡ еңеүселәргә лә "Мең ырыуы" төбәк-ара йәмәғәт ойошмаһы исеменән Маҡтау ҡағыҙҙары һәм иҫтәлекле бүләктәр тапшырылды.  

Был көндә майҙан шат тауыштарҙан яңғырап торҙо, ҡулдарында төрлө дәртләндереүсе әйберҙәр тотҡан көйәрмәндәрҙең дәртләндереү ауаздары,  күңелле көй-моңдар тирә-яҡҡа таралды. Ҡыҫҡаһы, спорт һөйөүселәрҙе берләштергән, сәләмәт тормошҡа әйҙәгән саранан барыһы ла ҡәнәғәт ҡалды.

Ләйлә Ғүмәрова әҙерләне.