Фатир һәм машина оторға мөмкин!

Башҡортостанда 6, 7 һәм 8 сентябрҙә һайлау барышында “Рәхмәт-2024” традицион акцияһы үткәреләсәк. “Башинформ” агентлығында ошо акцияға арналған матбуғат конференцияһы уҙғарылды. Унда “Рәхмәт-2024” акцияһының ойоштороу комитеты вәкилдәре Ринат Хәбиров, Регина Ҡәҙерова, Римма Бикмырҙина һәм Өфө ҡала округы советы рәйесе, Өфө ҡалаһы инвестиция-төҙөлөш комитетының генераль директоры Марат Вәсимов ҡатнашты.

Улар әйтеүенсә, тауыш биреү көндәренең береһендә үҙенең һайлау  хоҡуғын тормошҡа ашырғандар участкала акция партнерҙары әҙерләгән беләҙектәргә эйә буласаҡ, улар акция партнерҙарынан ташламалы хаҡҡа тауар алыу мөмкинлеге бирә. Партнерҙар һаны рахмат102.рф сайтында көн һайын яңыртылып тора.

Ғаиләләре менән һайлау участкаһына килгәндәргә шулай уҡ Q-билеттар ҙа тапшырыласаҡ (шул иҫәптән – балаларға ла). Был билеттар ҡиммәтле приздар отоу форсаты бирә. Төп приздар – фатирҙар, автомобилдәр, квадроциклдар һәм башҡалар.

Отош үткәреү ваҡыты түбәндәгесә: 6 сентябрҙә – 14.00 сәғәттән 20.00 сәғәткәсә, 7 сентябрҙә – 14.00 сәғәттән 20.00 сәғәткәсә, 8 сентябрҙә – 14.00 сәғәттә. Һәр отош үткәндән һуң уның һөҙөмтәһе рахмат102.рф сайтында күрһәтеләсәк.

Автор фотоһы.

bashgazet.ru/