Яңы милли проектҡа ярашлы тормошҡа ашырыласаҡ

Рәсәй Президенты Владимир Путиндың май указдарына ярашлы барлыҡҡа килгән “Торлаҡ һәм ҡала мөхите” милли проектының “Ҡала мөхитен формалаштырыу” федераль проектына ярашлы, быйыл Башҡортостанда 1,2 миллиард һумлыҡ 123 йәмәғәт биләмәһен ипкә килтерәсәктәр. Программа 67 тораҡта тормошҡа ашырыла. 2019 йылдан республикала, программаға ярашлы, тотош Башҡортостан буйынса 683 объект – парктар, скверҙар, яр буйҙары һәм башҡа йәмәғәт биләмәләре төҙөкләндерелгән.

Йәмәғәт киңлектәрен төҙөкләндереү һөҙөмтәһендә һуңғы биш йыл эсендә Башҡортостанда уңайлы мөхитле ҡалалар өлөшө - 33-тән 81 процентҡа, уңайлы ҡала мөхите булған ҡалалар һаны 7-нән 17-гә  тиклем артты. Быйыл “Торлаҡ һәм ҡала мөхите” милли проекты бурыстарын тормошҡа ашырыу тамамлана. 2025 йылда йәмәғәт биләмәләрен төҙөкләндереү “Тормош өсөн инфраструктура” милли проектына ярашлы тормошҡа ашырыласаҡ. 

Киләһе йылда 1,2 миллиард һумлыҡ 94 объектты төҙөкләндереү планлаштырылған. 

“Тормош өсөн инфраструктура” милли проектына ярашлы, биш федераль проект тормошҡа ашырыласаҡ. Улар – “Уңайлы ҡала мөхитен формалаштырыу”, “Ауыл биләмәләрендә инфраструктураны үҫтереү”, “Торлаҡ”, “Коммуналь инфраструктураны заманлаштырыу” һәм “Төҙөлөштөң яңы ритмы”.

Сығанаҡ, фото: БР Төҙөлөш һәм архитектура министрлығы.

https://bashgazet.ru