Өфөлә социаль такси йөрөй башлай

Һаулыҡ мөмкинлектәре сикләнгәндәр тураһында хәстәрлек йылында  Башҡортостанда пилот режимында “Социаль ташыуҙар” хеҙмәте эш башланы. Унан I төркөм инвалидтары һәм инвалид балалар файҙалана ала. Социаль такси пилот режимында Өфө буйынса эшләй.

- Айына дүрт тапҡыр бушлай йөрөргә мөмкин. Бөгөндән Өфө буйлап ете машина йөрөй. Тиҙҙән хеҙмәт автопаркын терәк-хәрәкәт аппараты боҙолған пассажирҙарҙы ташыу өсөн йыһазландырылған һигеҙенсе автомобиль тулыландырасаҡ. Йыл һайын һаулыҡ мөмкинлектәре сикләнгән 5 мең самаһы кешене социаль ташыуҙар менән тәьмин итергә планлаштырабыҙ, - тип һөйләне Башҡортостандың ғаилә, хеҙмәт һәм халыҡты социаль яҡлау министры вазифаһын башҡарыусы Ленара Иванова.

«Именлек» Республика геронтология үҙәге базаһында диспетчер эше яйға һалынған. Эште һөҙөмтәле ойоштороу өсөн кәмендә өс көн алдан заявка ҡабул ителә. Социаль такси менән дауаханаға, дарыуханаға, дәүләт һәм социаль учреждениеларға, Күп функциялы үҙәккә, вокзалдарға һәм «Өфө» халыҡ-ара аэропортына, көнкүреш хеҙмәттәре күрһәтеү ойошмаларына, элемтә бүлексәләренә һәм башҡа социаль әһәмиәтле учреждениеларға барырға мөмкин. Водителдәр махсус күнекмәләр үткән, улар пассажирҙарға машинаға ултырырға һәм унан сығырға, оҙатыусы булмаһа, учреждениеға инеү урынына барып етергә, баҫҡыстан йәки пандустан күтәрелергә ярҙам итәсәк.

Ғаризалар 88007877777 телефоны буйынса ҡабул ителә. Инвалид пассажирҙы ике кешегә тиклем оҙатып йөрөргә мөмкин, 14 йәшкә тиклемге балаларҙы оло кешенең алып йөрөүе мотлаҡ. Өфө ҡалаһы буйлап сәйәхәт ике сәғәткә тиклем дауам итә ала. Сервис дүшәмбе-йома көндәре 8.00 сәғәттән 17.00-гә тиклем эшләй. Йома һәм байрам алды көндәрендә – сәғәт 8.00-дән 16.00-гә тиклем.

Хәтерегеҙгә төшөрәбеҙ, 2 декабрҙән 6-ына тиклем Башҡортостанда Мөмкинлектәре сикләнгән кешеләр хаҡында хәстәрлек аҙналығы үтә, уның сиктәрендә реабилитация үҙәктәрендә, хәйриә фондтарында үҙенсәлекле балаларҙың ата-әсәләре менән семинарҙар һәм медиатив осрашыуҙар, инвалидтарға социаль ярҙам мәсьәләләре буйынса түңәрәк өҫтәлдәр, оҫталыҡ дәрестәре, һаулыҡ мөмкинлектәре сикләнгән балалар тәрбиәләгән ҡатын-ҡыҙҙар араһында матурлыҡ һәм талант конкурсы, инвалидтар өсөн вакансиялар йәрминкәһе ойоштороу планлаштырылған.

Тема буйынса тулыраҡ - республиканың Ғаилә, хеҙмәт һәм халыҡты социаль яҡлау министрлығының мәғлүмәт ресурстарында.

Фото һәм мәғлүмәт: https://pravitelstvorb.ru/news/25605/