Ташҡынды һауанан күҙәтәсәктәр

“Пилотһыҙ авиация системалары” милли проектының (национальный проект “Беспилотные авиационные системы”) маҡсаттарына ярашлы, Башҡортостан Республикаһында ташҡынды күҙәтеү өсөн пилотһыҙ осоу аппараттары ҡулланыласаҡ, тип хәбәр иттеләр республиканың Сәнәғәт һәм энергетика министрлығынан.

Башҡортостанда ташҡын һәр яҙ тиерлек республиканың һәр районына ҡағыла. 2024 йылда 313 ауыл һыу аҫтында ҡала, 2024 йылдың майына ҡарата торлаҡ биләмәләренә, юл инфраструктураһына, социаль өлкә объекттарына һәм күпер ҡоролмаларына ҡағылған 144 һыу баҫыу осрағы теркәлгән.

Бөгөнгө көндә БР Ғәҙәттән тыш хәлдәр министрлығы хеҙмәттәре заманса технологиялар ҡулланып яҙғы ташҡынға әҙерләнә. Ғәҙәттән тыш хәлдәр министрлығының Башҡортостан буйынса Баш идаралығының етәксеһе Марат Латипов хәбәр итеүенсә, боҙ хәлен һәм ташҡын хәлдәрен күҙәтеү өсөн пилотһыҙ осоусы аппараттарҙы (БПЛА) әүҙем файҙаланырға әҙерләнә.

– Пилотһыҙ осоусы аппараттар ярҙамында һыу кимәлен ғәмәлдәге ваҡыт режимында күҙәтеү Ғәҙәттән тыш хәлдәр министрлығы эшендә мөһим ҡорал буласаҡ: уларҙы файҙаланыу ҡотҡарыусыларға һауанан үҙгәрештәрҙе тиҙ арала күҙәтергә мөмкинлек бирәсәк, был ғәҙәттән тыш хәлдәргә яуап биреү тиҙлеген арттырасаҡ, – тип билдәләне Башҡортостан республикаһының сәнәғәт, энергетика һәм инновациялар министры урынбаҫары Рөстәм Нәбиуллин.

Пилотһыҙ авиация системаларының осоштарын Контролдә тотоуҙы Ғәҙәттән тыш хәлдәр буйынса дәүләт комитеты базаһында ойошторолған махсуслаштырылған үҙәк тормошҡа ашырасаҡ, был уларҙы файҙаланыуҙың хәүефһеҙлеген һәм һөҙөмтәлелеген тәьмин итергә мөмкинлек бирәсәк.

Иҫегеҙгә төшөрәбеҙ, милли проекттар Рәсәй Президенты Владимир Путиндың күрһәтмәләре буйынса тормошҡа ашырыла.

Айрат Нурмөхәмәтов фотоһы. 

https://bashgazet.ru