Илдең киләсәге улар ҡулында

Башҡортостан Республикаһында тарих, әҙәбиәт һәм химия буйынса Берҙәм дәүләт имтиханында юғары һөҙөмтәләр алған 72 йөҙ бал йыйыусы араһында икәүһе – Бишбүләк ауылы 2-се урта мәктәбен тамамлаусылар. Был Динар Агдеев һәм Андрей Михайлов. Улар 100-әр балл йыйған. Артем Михайлов 99 балл алһа, Максимов Юженин 90 балл алған. Уларҙың барыһы ла юғары уңыштарға өлгәшкән. Ҡатмарлы фәндәрҙән һаналған химия буйынса юғары һөҙөмтәләр! Был ҡаҙаныштар балаларҙың ныҡышмалы хеҙмәте генә түгел, ә уларҙың остазы Лилиана Рафаэловна Ялалованың, балаларға һәр яҡлап ярҙам иткән ата-әсәләрҙең тырыш хеҙмәтенең дә һөҙөмтәһе булып тора

- Башланғыс кластарҙан уҡ балалар биология, тирә-яҡ донъя, химия менән ҡыҙыҡһына. Мин 9-11 кластарҙа улар менән шөғөлләндем, - тип һөйләй Лилиана Ялалова. - Балалар олимпиадаларҙа әүҙем ҡатнашты һәм Рәсәйҙең алдынғы медицина вуздарына уҡырға инергә ынтылды. Уларҙың энергияһы һәм уңышҡа ынтылышы мине хайран ҡалдыра, сөнки улар иҫ киткес маҡсатҡа ынтылыш, көслө мотивация һәм характер ныҡлығы күрһәтә, даими рәүештә спорт күнекмәләренә йөрөй. Үҙҙәренең тырышлығы һәм һөҙөмтәле өйрәнеү оҫталығы арҡаһында улар маҡсаттарына өлгәшә.

Өҫтәп әйтергә кәрәк, егеттәр спорт менән әүҙем шөғөлләнә: Динар – шахматсы, Андрей даими рәүештә тренажер залына йөрөй.

- Уҡыу ваҡытында ғына түгел, мәктәптән тыш та бик әүҙем булдылар, бөтә өмәләрҙә, бөтә сараларҙа ҡатнаштылар, - ти класс етәксеһе Наталья Геннадьевна Николаева. - Беҙ улар менән 5-се кластан бирле бергә. Класс берҙәм һәм татыу, бында һәр ваҡыт уңдырышлы мөхит булдырылған, һәр ваҡыт бер-береһенә ярҙам итергә әҙер торалар.

Был юғары балдар киләсәктә башҡарыласаҡ эштәр өсөн ныҡлы нигеҙ булһын, ә мәктәптә алған белем иң ҡыйыу хыялдарҙы тормошҡа ашырырға ярҙам итәсәк!

Галина ВАРИКОВА,

фото шәһси архивтан.