Бишбүләк районы делегацияһы Мәскәүҙә булды

Форумда Башҡортостан делегацияһын Башҡортостан Республикаһы Башлығы хакимиәте етәксеһе вазифаһын башҡарыусы Искәндәр Рәүеф улы Әхмәтвәлиев етәкләне. Республика делегацияһы составына Бишбүләк районы вәкилдәре инде: Бишбүләк районы хәкимиәте башлығы вазифаһын башҡарыусы Артур Ғәлиев, Ҡыңғыр-Мәнәүез ауыл Советы ауыл биләмәһе башлығы Марат Яхин; Бикҡол ауыл Советы хәкимиәте  башлығы Рәшит Әхмәтшин; Калинин ауыл биләмәһе башлығы Ирек Лотфуллин.

Бишбүләк районы хакимиәте башлығы вазифаһын башҡарыусы Артур Ғәлиев сәфәрҙән алған тәьҫораттары менән уртаҡлашты.

- Сәфәр беҙгә ҙур тәьҫир ҡалдырҙы: сараның масштабы хайран ҡалдырҙы. Беҙҙең алда Рәсәй Президенты В.В. Путин сығыш яһаны. Липецк өлкәһе губернаторы Артамоновтың сығышын айырым билдәләп үтәм — ул өлкә райондары кимәлендәге идаралыҡҡа яһалма интеллект индереү тураһында һөйләне. Унда муниципалитет хеҙмәткәрҙәре яһалма интеллект менән эшләргә тулыһынса өйрәткәндәр: хәҙер уларҙың һәр береһе тейешле күнекмәләргә эйә, был, һис шикһеҙ, хеҙмәт етештереүсәнлегенә йоғонто яһай. Программаның байтаҡ өлөшөн ҡала мөхитен: парктарҙы, яр буйҙарын һәм башҡа йәмәғәт урындарын төҙөкләндереүгә арналған күргәҙмәләр тәшкил итә. Беҙ унда ярты көн булдыҡ, проекттар менән таныштыҡ һәм фотоға төшөрҙөк.

Тәнәфес ваҡытында Измайловолағы күргәҙмә үҙәгендә экскурсия булды (Эшлекле үҙәк «Центр России»). Унда илдең төбәктәрен үҙ эсенә алған экскурсия маршруты ойошторолдо: Беҙ Алыҫ Көнсығыш төбәге, Урал төбәге, Саха (Яҡут) һәм тағы бер нисә субъект зоналары буйлап үттек.

Сергей Викторович Лавров менән осрашыу планлаштырылғайны, әммә ул тормошҡа ашманы. Рәсәй Именлек Советы рәйесе урынбаҫары, «Берҙәм Рәсәй» партияһы рәйесе Дмитрий Медведевтың; Рәсәй Президенты хәкимиәте етәксеһенең беренсе урынбаҫары Сергей Владиленович Кириенконың сығыштары айырыуса әһәмиәтле булды.

Сығыш яһаусылар урындағы үҙидара органдары хеҙмәткәрҙәренең, шул иҫәптән яңы төбәктәрҙә фиҙаҡәр эшен билдәләне, шулай уҡ муниципаль хеҙмәткәрҙәрҙең заманса граждандар йәмғиәтен формалаштырыуҙа һәм «Берҙәм Рәсәй» партияһының халыҡ программаһын тормошҡа ашырыуҙағы ролен һыҙыҡ өҫтөнә алды. Сергей Владиленович Кириенко илдең төрлө төбәктәренән юғары һөнәри оҫталығы һәм намыҫлы хеҙмәт иткән коллегаларына дәүләт наградалары тапшырҙы. Уларға тиңләшәсәкбеҙ! - тип билдәләне Артур Амур улы.

Форум сиктәрендә делегаттар шулай уҡ III «Служение» бөтә Рәсәй муниципаль премияһын тапшырыу тантанаһында булды.

“Хеҙмәт итеү” премияһы Рәсәй Президенты Владимир Путин ҡушыуы буйынса үткәрелә. Уның маҡсаты – илдең муниципаль берләшмәһен туплау һәм муниципаль хеҙмәттең абруйын күтәреү. Ойоштороусы булып Рәсәй Федерацияһы Президенты Хакимиәте ярҙамында Бөтә Рәсәй урындағы үҙидараны үҫтереү ассоциацияһы сығыш яһай. Бында командалар һәм көндәлек эштәре менән бөтә ил буйынса ҡалаларҙа, ҡасабаларҙа, ауылдарҙа һәм округтарҙа тормошто яҡшы яҡҡа үҙгәрткән кешеләр билдәләнә.

Быйыл премияға ҡыҙыҡһыныу ҙур булды: дәғүә итеүгә 11 номинация буйынса 63 397 ғариза килгән. Уларҙың һәр береһенең артында реаль башланғыстар һәм үҙ муниципалитетын яҡшыртыу теләге тора. Премияла хакимиәт башлыҡтары һәм хеҙмәткәрҙәре генә түгел, депутаттар, ауыл старосталары, муниципаль ойошма хеҙмәткәрҙәре — халыҡ менән бергә эшләгән һәм уларҙың ихтыяждарын белгән һәр кем ҡатнаша.

Бүләкләү тантанаһы форумдың мөһим өлөшө булды. «Ватанға хеҙмәт итеү хаҡына Батырлыҡ һәм ҡаһарманлыҡ» номинацияһында еңеүсене Владимир Путин шәхсән үҙе бүләкләне. Ул — Серпей урта мәктәбе директоры, Калуга өлкәһе Мещовский муниципаль округы депутаты Евгений Филонов, уның башҡарған эштәре үҙенең бәләкәй ватанына, кешеләренә һәм тыуған иленә ысын хеҙмәт өлгөһө булып тора.

“Хеҙмәт итеү” премияһы йәнә бер тапҡыр муниципаль хеҙмәттең кешеләрҙең яуаплылығына, көндәлек эшенә һәм ышанысына нигеҙләнеүен һыҙыҡ өҫтөнә алды. Был сарала Башҡортостан вәкилдәре, шул иҫәптән Бишбүләк районы делегаттары, биләмәләрҙең киләсәге, урындағы үҙидараны үҫтереү һәм урындарҙа барлыҡҡа килгән башланғыстарға ярҙам итеү тураһында ҙур һөйләшеүҙәрҙә ҡатнаша алды.

Сергей ИВАНОВ.

­­