Рәсәйҙән һәм сит илдән ҡунаҡтар килеүе көтөлә

Башҡортостан Хөкүмәте ҡарарына ярашлы, уның дауамы булараҡ 27 майҙа Айғырбатҡан ауылы янындағы майҙанда «Урал аръяғы – 2023» Бөтә Рәсәй инвестиция һабантуйы үтәсәк.

Байрамда федераль һәм төбәк дәүләт учреждениелары вәкилдәре, тотош Рәсәйҙән һәм сит илдән ҡунаҡтар килеүе көтөлә.

Байрам килгән ҡунаҡтарҙы милли үҙенсәлек менән таныштырыу, халыҡ йолалары, аш-һыу, ғөрөф-ғәҙәттәрҙе күрһәтеүҙе, милли ризыҡтарыбыҙҙан ауыҙ иттереүҙе, үҙешмәкәр ижадты һәм спорт уйындарын үҫтереүҙе маҡсат итә.

Байрам концерты ҡаралған, майҙанда ҡоролған тирмәләрҙә башҡорт халҡының боронғо ғөрөф-ғәҙәттәрен, йолаларын, үҙенсәлекле кәсептәрен күрергә мөмкин буласаҡ.

Һабантуй программаһында ат сабыштары, милли көрәш, гер спорты, волейбол һәм мини-футбол, грэпплинг, армреслинг һәм башҡа ярыштар, төрлө халыҡ уйындары буласаҡ.

Һабантуй майҙанында сауҙа предприятиелары, эшҡыуарҙар һатыу итәсәк. Башҡортостан Башлығы Радий Хәбировтың күрһәтмәһенә ярашлы һабантуй яланында спиртлы эсемлектәр һатыу тыйыла.

oskon.info