Өфөнән фотохәбәрсе тағы бер һөнәр үҙләштерә

16 йыл дауамында «Кызыл таң» гәзитендә фотохәбәрсе булып эшләгән һәм «Башҡортостан Республикаһының атҡаҙанған матбуғат һәм киң мәғлүмәт хеҙмәткәре» исеменә лайыҡ булған 50 йәшлек Динар Кәлимуллин дүрт йыл элек буш ваҡытында күндән уникаль әйберҙәр яһай башлаған.

Оҫта күндән бөтәһен дә тиерлек эшләй ала - сумкалар ҙа, төрлө документтар өсөн тышлыҡтар ҙа, блокноттар ҙа, янсыҡтар ҙа, ҡайыштар ҙа, күҙлектәр, асҡыстар өсөн тышлыҡтар ҙа. Бындай белгестәр тураһында бик аҙ беләләр, уларҙы дуҫтары һәм таныштары аша табалар, ә улар яһаған әйберҙәр менән ғорурланалар һәм йылдар буйына файҙаланалар.

- Күн әйберҙәр мине һәр саҡ ҡыҙыҡһындырҙы. Ә үҙемдең ҡулым менән тегелгән әйберҙәрҙең береһе - ҡын. Заманында ҡулдан бысаҡ алғайным, ләкин ул ҡынһыҙ йөрөнө. Һәм ҡынды ҡайҙан алырға икән, тип уйға баттым. Таныш итексенән Өфөлә тәбиғи тирене ҡайҙан табырға мөмкин икәнлеген һораным. Ул ҡайҙан һатып алырға икәнен өйрәтте. Әгәр ҡулың әҙ-мәҙ булһа ла эш белә икән, унда ептәрҙе лә, башҡа нәмәләрҙе лә таба-эшләй башлайһың. Ҡынды тегеүҙән бик ҡәнәғәт ҡалдым. Һәм яйлап эш башланды, - ти ул.

"Ә һин эшләргә хыялланған, әммә әлегә йөрьәт итмәгән нәмә бармы?" тигән һорауға былай тип яуап ҡайтарҙы:

- Һәр нимәгә тотонорға һәм проблемаһыҙ эшләй аламын тип уйлайым. Унан да бигерәк кемделер ҡабатлағы килмәй. Әйберҙе үҙең уйлап текһәң, күп нескәлектәрҙә тәжрибә туплайһың. Күп тапҡыр материалды боҙған осраҡ булды. Әйберҙәрҙе камилыраҡ итергә теләйһең. Ябай кеше күп кенә хаталарҙы күрмәй. Профессионалерәк эшләргә теләр инем. Сөнки намыҫ менән эшләнгән әйберҙе шатланып алып китһәләр, һин дә шатлыҡ кисерәһең һәм әхлаҡи ҡәнәғәтлек алаһың. Иң мөһиме - был кешенең тағы ла киләсәген аңлайһың. Күн эше менән, әлбиттә, аҡса өсөн түгел, ә ҡыҙыҡ өсөн шөғөлләнәм. Килеп сыҡҡас, ниңә хоббиң аша өҫтәмә аҡса эшләүҙән баш тартырға? - ти Динар Кәлимуллин.

Сығанаҡ: bashgazet.ru