Бюджет хеҙмәткәрҙәренең уртаса эш хаҡы ниндәй?

Статистиктар мәғлүмәте буйынса, былтыр ғинуар-декабрь айҙарында балалар баҡсаларында тәрбиәселәрҙең уртаса эш хаҡы – 28 053 һумға, мәктәп уҡытыусыларының – 29 999 һумға, өҫтәмә белем биреү педагогтарының 30 511 һумға етте.

Урта махсус уҡыу йорттарында уҡытыусыларҙың һәм мастерҙарҙың хеҙмәт хаҡы бер аҙ юғары – уртаса 30 648 һум.

Юғары уҡыу йорттары уҡытыусыларының уртаса хеҙмәт хаҡы уҙған йылда 62 729 һум тәшкил итте. Ғилми хеҙмәткәрҙәр ай һайын тағы ла күберәк алды – уртаса 65 270 һум.

Медицина өлкәһенә килгәндә, 2018 йылда табиптарҙың уртаса эш хаҡы 60 194 һумға етте.

Урта медицина персоналының хеҙмәт хаҡы ике тапҡырға түбәнерәк – 30 252 һум,ә кесе медицина персоналының – 30 673 һум.

Социаль хеҙмәткәрҙәрҙең һәм мәҙәниәт хеҙмәткәрҙәренең эш хаҡы күләме оҡшаш – ғинуар-декабрҙә уртаса 30 551 һәм 30 377 һум, тип белдерҙе статистиктар.