"Аттилла" - Мәскәү сәхнәһендә

Сәхнә әҫәре Башҡорт дәүләт опера һәм балеты театры труппаһының Мәскәүҙәге гастролдәре барышында күрһәтелде. Мәҙәни сарала республика Башлығы Радий Хәбиров та ҡатнашты. Ҙур театрҙа уҙған сара Башҡортостандың тормошо, бай мәҙәниәте һәм ижади ҡеүәте менән ҡыҙыҡһынған тамашасыларҙың, шул иҫәптән яҡташтарыбыҙҙың осрашыу кисәһенә лә әйләнде. Килгәндәр араһында федераль власть органы вәкилдәре, Федерация Советы ағзалары һәм Дәүләт Думаһы депутаттары, артистар, спортсылар, йәмәғәт эшмәкәрҙәре бар ине.

"Спектаклгә күтәренке кәйефтә килдем. Был беҙҙең театр труппаһына күрһәтелгән юғары хѳрмәт. Илебеҙҙең танылған сәхнәһендә сығыш яһау беҙгә ҡарата оло иғтибарҙың сағылышы ул. Илебеҙҙең мәҙәни йәмәғәтселегенең Башҡортостан артистарының тотҡан урынын, юғары әһәмиәтен таныуы билдәһе. Тамашаны ҡуйыу ѳсѳн һѳйләшеүҙәр ҙә алып барылды. Тамашабыҙҙы сәхнәгә сығарырға мѳмкинлек биргәндәре ѳсѳн Ҙур театр етәкселегенә ҙур рәхмәт. Әлбиттә, беҙ бында йышыраҡ булырға һәм иң яҡшы спектаклдәрҙе ҡуйырға теләйбеҙ. Рәсәй, донъя сәнғәтенең заман талаптарына яуап биреүе ѳсѳн беҙгә әле күп эшләргә кәрәк", - тине республика етәксеһе.

“Аттила” операһы - Башҡортостандың һәм Татарстандың халыҡ артисы, “Алтын битлек” Рәсәй милли театр премияһы лауреаты, ике тапҡыр “Грэмми” яулаған Илдар Абдразаҡовтың режиссерлыҡ дебюты булды.

Ул Башҡорт дәүләт опера һәм балет театрының иң ҙур тамашаһы булып тора. Тѳп партияларҙы Илдар Абдразаҡов, Вероника Джиоева, Василий Ладюк кеүек билдәле опера артистары һәм Ѳфѳ труппаһынан солистар Владимир Орфеев, Артур Ҡәйепҡолов, Айҙар Хәйруллин башҡарҙы. Спектаклдә Башҡорт дәүләт опера һәм балет театрының оркестры, хоры, балеты һәм балалар опера студияһы ҡатнашты.

"Был беҙҙең театрҙың, бѳтә коллективтың ҡаҙанышы. Сығыш яһаған оркестрға, бѳтәһенә лә рәхмәт. Костюмдар, матур декорация ѳсѳн ҡуйыусы тѳркѳмгә рәхмәт. Республика етәкселеге булышлыҡ итмәһә, быларҙың береһе лә булмаҫ ине. Радий Фәрит улы, ярҙамығыҙ ѳсѳн рәхмәт", - тип белдерҙе Илдар Абдразаҡов.

Фото: глава РБ

Башинформ.