Радий Хәбиров Башҡортостан башлығы вазифаһына тәҡдим ителде

Алдан тауыш биреү процедураһында ҡатнашҡан барлыҡ дүрт кандидат та конференцияла ҡатнашыусыларҙы үҙҙәренең программалары менән таныштырҙы. Хәтерегеҙгә төшөрәбеҙ, «Берҙәм Рәсәй» праймеризында Рәсәй Федерацияһы Дәүләт Думаһы депутаты Зариф Байғусҡаров, Башҡортостан Хөкүмәте вице-премьеры вазифаһын башҡарыусы Борис Беляев, «Рәсәй терәге»нең төбәк бүлексәһе етәксеһе Ләйсән Николаева һәм Башҡортостан Башлығы вазифаһын ваҡытлыса башҡарыусы Радий Хәбиров ҡатнашты.

«Эшмәкәрлегемдең һәм командамдың төп маҡсаты — республикабыҙҙың күп милләтле халҡының мәнфәғәттәре. Халыҡтың теләктәрен иҫәпкә алырбыҙ һәм улар менән ғәҙел булырбыҙ. Беҙ билдәле бер һайлау процесын башлайбыҙ. Һәр берегеҙ минең һәм командамдың эшен күрҙе. Артабан да эшмәкәрлегемдә бер нәмә лә үҙгәрмәҫ», — тине Радий Хәбиров.

Кандидаттарҙың сығышынан һуң конференцияла ҡатнашыусылар йәшерен тауыш бирҙе. 323 делегаттың 264-е Радий Хәбиров яҡлы булыуын белдерҙе.

http://www.bashinform.ru