Республикала 1134 ҡатын-ҡыҙға статистика буйынса 1000 ир-ат тура килә

Башҡортостанда 2,2 миллион ҡатын-ҡыҙ йәшәй, был бөтөн халыҡтың 53 процентын тәшкил итә. Статистика мәғлүмәттәре буйынса, 1134 гүзәл затҡа 1000 ир-ат тура килә. Бындай мәғлүмәттәрҙе ҡатын-ҡыҙҙар байрамы алдынан Башҡортостанстат баҫып сығарҙы. Белгестәрҙең иҫәптәре буйынса, ирҙәрҙең һәм ҡатын-ҡыҙҙарҙың йәш категорияларҙа нисбәте төрлөсә. Элеккесә ҡыҙҙарға ҡарағанда, күберәк малайҙар тыуа (1000 малайға уртаса – 950 ҡыҙ). 34 йәштән һуң ҡатын-ҡыҙҙар күпселекте тәшкил итә башлай. Гүзәл заттарҙың өҫтөнлөгө олоғайған һайын арта, 70 йәшкә уларҙың һаны йәштәш ир-егеттәргә ҡарағанда 2,3 тапҡырға күберәк. Ҡатын-ҡыҙҙар оҙағыраҡ йәшәй, уларҙың ғүмер оҙонлоғо 76 йәш тәшкил иткән, ир-егеттәр 10 йәшкә әҙерәк йәшәй.

Ҡатын-ҡыҙҙар күбеһенсә һаулыҡ һаҡлау һәм социаль хеҙмәттәр күрһәтеү өлкәһендә, мәғарифта – 84 процент, күмәртәләп һәм ваҡлап сауҙа итеүҙә, ҡунаҡханаларҙа һәм ресторандарҙа 68 процент эшләй.

Иҡтисадта мәшғүл булған ҡатын-ҡыҙҙар ир-аттарға ҡарағанда юғарыраҡ белем кимәленә эйә. Эшләүсе ҡатын-ҡыҙҙарҙың 34,4 проценты юғары белемле, ир-егеттәр араһында – 21,8 проценты.

Студенттар араһында ла ҡыҙҙар күберәк. Мәҫәлән: юғары уҡыу йорттарында – 54,2 процент, урта звено белгестәрен әҙерләүсе белем биреү ойошмаларында – 48,2 процент. Һаулыҡ һаҡлау, иҡтисад һәм идара итеү, мәғариф, мәҙәниәт һәм сәнғәт, хеҙмәтләндереү өлкәһе белгеслектәре буйынса белем алыусы студенттар араһында ла гүзәл заттар өҫтөнлөк итә.