Дим буйҙары
-24 °С
Болотло
75 лет Победы
Бөтә яңылыҡтар
ЙӘМҒИӘТ
20 Август 2018, 19:44

“Бергәләп бик күп изге эштәр эшләнек”

V саҡырылыш Дәүләт Йыйылышы – Ҡоролтай депутаттарының эшенә йомғаҡ яһалды

16 августа район Мәҙәниәт һарайында район халҡының депутаттар Айҙар Ғәни улы Ғәлимов һәм Илдус Ришат улы Ғүмәров менән осрашыуы булды. Һуңғы биш йыл дауамында бына тап улар беҙҙең район мәнфәғәтен Дәүләт Йыйылышы - Ҡоролтайҙа тәҡдим итте. Әлеге осрашыу үҙенә күрә район хакимиәте менән депутаттарҙың уртаҡ башҡарған эштәренә йомғаҡ яһау булды.

- 2013-2018 йылдарҙа районда социаль-иҡтисад тармағын, мәҙәниәт һәм мәғарифты үҫтереү буйынса күп кенә эштәр башҡарылды. Элекке сығарылыш депутаттары Эрнест Фәрит улы Исаев, Рәис Нуриман улы Сәүбәнов булдырған изгелекле традицияны беҙҙең энергиялы һәм инициативалы депутаттарыбыҙ дауам итте. Айҙар Ғәни улы Ғәлимов менән Илдус Ришат улы Ғүмәров ярҙамынан башҡа күп проекттар тормошҡа ашырылмай ҡалған булыр ине. Район халҡы исеменән һеҙгә ярҙамығыҙ өсөн ҙур рәхмәт белдерәм, - тине район хакимиәте башлығы Наил Ғабдулла улы Ғатауллин.

Осрашыу ябай булмаған формала үтте, унда Наил Ғабдулла улы доклад яһаусы ғына түгел, ә биш йыл эсендә булған барлыҡ әһәмиәтле саралар буйлап экскурсия яһаусы булараҡ та сығыш яһаны. Экранда күрһәтелгән слайдтар ярҙамында залда ултырыусылар ошо йылдарҙа ниндәй ыңғай үҙгәрештәр булыуын үҙ күҙҙәре менән күрҙе һәм баһаланы. Күпселек социаль әһәмиәтле объекттар – балалар майҙансыҡтары, мәктәптәр, мәҙәниәт йорттары – оҙаҡ йылдар капиталь ремонт йәки төҙөкләндереү талап итә ине, әлеге мәсьәләне хакимиәт дәрәжәһендә хәл итеп булмай: шаҡтай сығымдар талап ителә. Район хакимиәте, депутаттар һәм район халҡының бер команда булып эшләүе үҙ һөҙөмтәһен бирҙе: “Умка” балалар баҡсаһы үҙенең ишектәрен асты. Айыт, Йылбулаҡтамаҡ һәм Ҡушйылға ауылдары уҡыусылары барлыҡ заманса талаптарға яуап биреүсе капиталь ремонттан һуң мәктәптәрҙе ҡабул итте; Айытта ауыл дауаханаһын төҙөкләндерҙеләр; Бишбүләктең төньяҡ-көнбайыш микрорайонында газүткәргес һәм һыу үткәргес төҙөлдө; Дүсәндә һәм Баҙлыҡта ауыл Күп функциялы мәҙәни үҙәктәр барлыҡҡа килде; Еңеү паркында Бөйөк Ватан һуғышы йылдарында һәләк булған яҡташтар иҫтәлегенә ҡуйылған һәйкәл реконструкцияланды ; хоккей ҡабы; балалар уйын майҙансыҡтары, төҙөлдө; Бишбүләктә бассейн менән физкультура-һауыҡтырыу комплексы төҙөлдө, резина ҡапламы менән ГТО нормаларын тапшырыу өсөн майҙансыҡ төҙөкләндерелде, юлдарға ремонт яһалды. Һәм был һуңғы биш йылда эшләнгәндәрҙең ни бары бер нисәүһе генә.

Был көндә сәхнәгә сыҡҡан барлыҡ кешеләр даими ҡайғыртыусанлыҡтары һәм ярҙамдары өсөн БР Дәүләт Йыйылышы – Ҡоролтай депутаттары Айҙар Ғәлимов менән Илдус Ғүмәровҡа ҙур рәхмәт белдерҙеләр.

- Биш йыл бер көн кеүек үтте. Эш ваҡытында беҙ күңелебеҙ менән Бишбүләк районының тормошо менән йәшәнек, - тиҙәр үҙҙәренең сығышында Айҙар Ғәлимов менән Илдус Ғүмәров. – Бында эшләп, беҙ бик ҙур рухи көс алдыҡ. Бында изге, хеҙмәт һөйөүсән, ижади халыҡ йәшәй. Биш йыл эсендә барлыҡҡа килгән дуҫ-татыу мөнәсәбәттәр дауам итер, һәм беҙҙең Бишбүләк районы файҙаһына киләсәктә лә хеҙмәттәшлек дауам итер, тип ышанабыҙ.

Ирина Фомсина,

Олег Леонтьев фотоһы.
Читайте нас в