Был иҫәндәр өсөн кәрәк

Элегерәк был урында иҫкергән тимер обелиск торған. Ауыл кешеләре уны күптән яңыртырға планлаштырған. Әлеге изге эшкә «Берҙәм Рәсәй» партияһы 99 мең һум бүлгән, Ерекле ауыл Советы ауыл биләмәһе хакимиәте, ауылдың 70-тән ашыу кешеһе лә ситтә ҡалмаған. Монументты урынлаштырыу hәм территориянә төҙөкләндереү буйынса барлыҡ эште ауыл халҡы үҙ көсө менән башҡарған. Һөҙөмтә шатландыра: ауыл үҙәгендә, бейек нараттар аҫтында өс мәрмәр плитә ғорур ҡалкып тора, уға ерҙәге тыныслыҡ хаҡына ҡорбан булған геройҙарҙың исемдәре яҙылған.

Мемориалды тантаналы асыу алдынан Ҡырғыҙ –Миәкә ауылынан килгән Кирилл атаҡай мәрхүм булғандар рухына панихида үткәрҙе. Бөйөк Ватан һуғышында ҡатнашыусы тугандарының фотографияларын тотҡан балалар уҡытыусылары етәкселегендә мемориалдың ике яғына теҙелеп баҫты.

Ерекле ауыл Советы ауыл биләмәһе башлығы Александр Петров барыһын да ауыл өсөн әһәмиәтле ваҡиға уңайынан ҡотланы hәм битараф булмағандарҙың барыһына ла рәхмәт әйтте.

— Бөйөк Ватан һуғышы барыһына ла ҡағылған, барыһы ла һуғышҡан. Беҙҙең ауыл биләмәһенән фронтҡа 242 кеше киткән, 93 һалдат кире әйләнеп ҡайтмаған. Шулай уҡ Туҡмаҡҡаран ауылынан 13 hәм Покровка ауылынан 29 һуғышсыны оноторға беҙҙең хаҡыбыҙ юҡ. Яҡын киләсәктә уларҙың исемен дә ҡара мәрәмәр плитәгә һис шикһеҙ яҙасаҡбыҙ. Ерекле ауылынан Советтар Союзы Геройы гвардия капитаны Павел Ефимович, Покровка авылынан гвардия сержанты Василий Федорович Титов менән хаҡлы ғорурланырға тейешбеҙ. Был беҙҙең тарихыбыҙ. Һәм хәҙерге ваҡытта ла беҙҙең ауыл биләмәһенән егеттәр армияла хезмәт итә.Улар араһында өлгө буларҙайҙары бар. Был контракт буйынса хеҙмәт итеүсе өлкән прапорщик Эдуард Миронов, ул Чечен һуғышын үткән hәм «Батырлыҡ өсөн» миҙалы менән бүләкләнгән.

Хакимиәт исеменән Кесе Сиҙәк ауылы халҡын мәғлүмәт-аналитика бүлеге начальнигы Сергей Иванов ҡотланы hәм урындағы үҙидара үҫешенә ҙур шәхси өлөш индергән һәм ауылды төҙөкләндереүҙә актив ҡатнашҡаны өсөн ауыл старостаһы Иван Григорьевҡа Маҡтау грамотаһы тапшырҙы. Ерекле ауыл Советы ауыл биләмәһенең Рәхмәт хаттарына шулай уҡ мемориалды урынлаштырыуҙа актив ярҙамы өсөн Иван Гаврилов лайыҡ булды. Эштәрҙе башҡарғанда, йәштәрҙе лә йәлеп иткәне өсөн Ерекле ауыл Советы ауыл биләмәһенең йәштәр эштәре буйынса белгес Сергей Семеновты ауыл биләмәһе Маҡтау грамотаһы менән бүләкләне.

Бишбүләк районының хәрби комиссары Валерий Шәрифуллин hәм Кесе Сиҙәк төп белем биреү мәктәбе директоры Александр Гильдеев бер тауыштан тарихты нисек кенә боҙорға, һыҙып ташларға тырышмаһындар, уны белергә hәм иҫтә тоторға кәрәк, үҫеп килеүсе быйын үҙ геройҙарын белергә, уларҙың хәтерен хөрмәтләргә һәм улар менән ғорурланырға тейеш тигән фекергә килделәр.

Наталья МИНАЕВА.

Автор фотоһы.