Көҙгө каникулдар

Был аҙна беренсе мәктәп каникулдары алдынан һуңғыһы. Балалар 28 октябрҙән 5 ноябргәсә ял итә. Ә кемдәр шәмбе уҡый, уларға йома, 26 октябрь – һуңғы уҡыу көнө.

Икенсе сиректә тәүге ҡыңғырау 6 ноябрҙә яңғырай. Башҡортостандың Мәғариф министрлығы ғәҙәттә яңы уҡыу йылы башында мәктәп каникулдарын, дәүләт байрамдарынан сығып, билдәләргә кәңәш итә. Әммә һуңғы ҡарарҙы белем биреү йорто етәкселеге ҡабул итә һәм уға мәктәптә уҡытыу системаһы (сиректәр; триместрҙар; модулдәр) йоғонто яһай.

Башланғыс класс уҡыусылары уҡыу йылында 35 көн (йәйге каникулдарҙы иҫәпләмәгәндә) ял итә, өлкән кластар – 30 көн. Ул 1-4 кластағы балаларға уҡыу процесына яраҡлашыу һәм өйрәнеү кәрәклеге менән бәйле.