Районға республика кардиүҙәге табиптары килде

Бишбүләктә Республика кардиология үҙәге табиптарының Бишбүләк, Миәкә, Йәрмәкәй, Бәләбәй, Әлшәй, Дәүләкән райондарының кардиологтарға, терапевттарға, дөйөм практика табиптарына, ФАП фельдшерҙарына, шәфҡәт туташтарына ойоштороу-методик ярҙам күрһәтеү буйынса күсмә сараһы булды.

Сара район хакимиәтенең ултырыштар залында һөйләшеүҙән башланды. «Артериаль гипертонияны дауалау буйынса заманса кәңәштәр», «Йөрәк-ҡан тамырҙары ауырыуҙарының хәүеф факторҙары» тигән доклад hәм киңәйтелгән презентациялар менән Башҡортостан Республикаһының Һаулыҡ һаҡлау министрлығының штаттан тыш кардиологы, Республика кардиология үҙәгенең баш табибы Ирина Николаева сығыш яһаны. Республика кардиология үҙәгенең ойоштороу-методик эш буйынса баш табип урынбаҫары Венера Камалова докладының темаһы — «Ҡан әйләнеше системаһы ауырыуҙарын кодлаштырыуҙың проблемалы мәсьәләләре». Семинарҙа ҡан әйләнеше системаһы ауырыуҙарына ҡағылышлы киҫкен мәсьәләләр тураһында фекер алыштылар. Дауахананың залында кардиология үҙәгенең баш шәфҡәт туташы Ирина Назарова ФАП фельдшерҙары, ашығыс медицина ярҙамы бригадаларының фельдшерҙары менән йөрәк-ҡан тамырҙары ауырыуҙары менән яфаланыусыларға ашығыс ярҙам күрһәтеү мәсьәләләре буйынса семинар үткәрҙе. Йөрәк-үпкә реанимацияһы күрһәтеү буйынса ла практик дәрес уҙғарылды. Сара сиктәрендә үҙәк район дауаханаһында кардиологтар ауырыуҙарҙы ҡабул итте. 30-ға яҡын пациент дауалау, консультация hәм Республика кардиоүҙәгенә йүнәлтмә алды.

Район буйынса эш сәфәре барышында Республика кардиүҙәгенең баш табибы Ирина Евгеньевна Кыңғыр-Мәнәүез ауылы балалар hәм үҫмерҙәр өсөн социаль приютында булды, балалар менән аралашты hәм бүләктәр тапшырҙы. Республика кардиоүҙәге табиптары Кыңғыр-Мәнәүез hәм Уҫаҡ-Кисеү ФАП-тарында дауалау-методик ярҙам күрһәтте.

Ирина Михайлова.

Виталий АНДРЕЕВ фотоһы.

Читайте нас