Дим буйҙары
-13 °С
Ҡар
75 лет Победы
Бөтә яңылыҡтар
ЙӘМҒИӘТ
16 Апрель 2019, 09:36

Автомобилдең үҙ урыны бар

Хәбәр итеүебеҙсә, Дәүләт Йыйылышы – Ҡоролтай депутаттары газондарға, балалар һәм спорт майҙансыҡтарына машина ҡуйған өсөн штраф һалыу йәһәтенән “Башҡортостан Республикаһының Административ хоҡуҡ боҙоуҙар тураһындағы кодексына үҙгәрештәр индереү тураһында” закон ҡабул итте. Бөгөн иһә Хөкүмәттә үткән оператив кәңәшмәлә республика етәксеһе Радий Хәбиров, парковкала тәртип булдырыу мөһимлеген билдәләп, коллегаларына әлеге законды ҡабул иткән өсөн рәхмәт белдерҙе.

Штраф күләме ярайһы ҙур: граждандарға – бер меңдән ике мең һумға тиклем, вазифалы кешеләргә – биш – ун мең һум, ойошмаларға – 20 – 30 мең һум. Ә инде ошондай тәртип боҙоу ҡабатланһа, түләү күләме ике тапҡырға артасаҡ.

Закон буйынса, протокол төҙөү һәм штраф һалыу район хакимиәттәрендәге административ комиссияның вәкәләтенә инә. Был йәһәттән белешмәне урындағы муниципалитеттың рәсми сайтында “Административ комиссия” бүлегендә табырға мөмкин. Теләгән һәр кем тыйылған ергә ҡуйылған автомобилдәрҙе фотоға төшөрөп ебәрә ала. Рәсәй Федерацияһының Административ тәртип боҙоуҙар тураһында кодексының 26.7-се статьяһындағы 2-се бүлеккә ярашлы, фотолар йәки видеояҙмалар дәлил булып иҫәпләнәсәк. Әммә бының өсөн түбәндәге шарттарҙы үтәү мөһим:

1. Мөрәжәғәт аноним булырға тейеш түгел. Мәғлүмәт ебәргән кеше махсус бланк тултырырға бурыслы. Уны Башҡортостандың Юстиция эштәре буйынса дәүләт комитеты сайтынан (https://goskomjust.bashkortostan.ru/documents/active/218812/) күсереп алырға мөмкин. Бланкта мөрәжәғәт итеүсенең исем-фамилияһы, телефон номеры, электрон почта адресы, шулай уҡ тәртип боҙоу осрағының ҡайҙа, ҡасан булыуы, фотоның ниндәй телефондан төшөрөлгәне күрһәтелергә тейеш.

2. Видеояҙмаларҙың, фотоларҙың сифатлы булыуы шарт. Автомобилдең тыйылған урында торғаны (урамдың исеме, йорттоң һаны төшөрөлһә, тағы ла яҡшы), теркәү номерының асыҡ күренеүе мөһим. Водитель машинаһының салонында телефон һандарын яҙып ҡалдырған икән, уны ла төшөрөргә кәрәк.

Ғариза, фото, видеояҙма урындағы хакимиәт сайтының административ комиссия бүлегенә ебәрелә.

Ялыу, рәсми мөрәжәғәт булараҡ, “Рәсәй Федерацияһының мөрәжәғәттәрҙе ҡарау тәртибе тураһында”ғы законға ярашлы тикшерелә, шуға ла унда күрһәтелгән адресҡа административ комиссия ҡабул иткән ҡарар тураһында белдереү ҡағыҙы киләсәк.

Әгәр автомобиль ышаныс ҡағыҙы буйынса бүтән кешегә файҙаланыуға тапшырылһа, йә урланған булһа, быны иҫбатларға тура киләсәк. Хәҙер транспортты ҡуртымға биргән компаниялар бар. Уларҙан автомобилде ҡулланған кеше тураһында мәғлүмәт алынып, был гражданға штраф һалына.

Мәғлүм булыуынса, юл хәрәкәте ҡағиҙәләрен боҙған өсөн һалынған ҡайһы бер штраф төрҙәрен 20 көн эсендә түләһәң, илле процент күләмендә ташлама ҡаралған. Газонды, спорт һәм балалар майҙансығын тәләфләгәндәргә иһә был ҡағылмай.

Автотранспортты тротуарҙа ҡуйған өсөн Рәсәй Федерацияһының Административ тәртип боҙоуҙар тураһында кодексының 12.19-сы статьяһындағы 3-сө пунктҡа ярашлы штраф һалына. Протоколды юл хәрәкәте хәүефһеҙлеге дәүләт инспекторҙары төҙөй.

Һорауҙар тыуған осраҡта, урындағы административ комиссияға мөрәжәғәт итә алаһығыҙ. Әгәр ҙә инде уның эшенә ҡағылышлы аңлашылмаусанлыҡтарға юл ҡуйылһа, Башҡортостандың Юстиция эштәре буйынса дәүләт комитетының административ комиссиялар эше буйынса бүлегенә (8(347) 218-10-34) шылтыратырға мөмкин.

bash.rbsmi.ru
Читайте нас в