Ураҙа байрамы мөбәрәк булһын!

Ҡотлауҙа былай тиелә:

“Хөрмәтле Башҡортостан Республикаһы мосолмандары!

Һеҙҙе изге Рамаҙан айының тамамланыуы һәм Ураҙа байрамы менән ихлас ҡотлайым!

Атай-олатайҙарыбыҙҙың йолаларын ихтирам итеп, беҙ уларҙың васыятын үтәргә тырышабыҙ, рухи камиллыҡҡа ынтылабыҙ, изге эштәр ҡылабыҙ, мохтаждарға ярҙам итәбеҙ. Бөгөн иманлылар ураҙаның тамамланыуын билдәләү, бер-береһенә хөрмәт күрһәтеү, күңел йылыһын уртаҡлашыу, иҫтәлекле ваҡиғаларҙы хәтергә төшөрөү, мәрхүмдәрҙе иҫкә алыу өсөн туғандары һәм яҡындары янына йыйыла.

Республикабыҙҙа бөтә милләт һәм дин вәкилдәренең бергәләп Башҡортостандың лайыҡлы киләсәген төҙөү өсөн бөтә шарттар булдырылған. Беҙҙә ғаилә ҡиммәттәре, диндәр араһындағы, дәүләт менән конфессиялар араһындағы хеҙмәттәшлек нығый.

Башҡортостандың мосолман өммәтенә хәйриә эшмәкәрлеге, йәштәргә әхлаҡи тәрбиә биреүҙә ярҙам күрһәткәне, йәмәғәт тормошонда әүҙем ҡатнашҡаны, республикала татыулыҡты нығытыуға булышлыҡ иткәне өсөн ихлас рәхмәтемде белдерәм.

Изге Ураҙа байрамы йорттарыбыҙға йылылыҡ, йәм, иман нуры һәм күңел тыныслығы килтерһен! Һеҙгә ныҡлы һаулыҡ, именлек, барлыҡ изге эштәрегеҙҙә уңыштар теләйем!”

bash.rbsmi.ru