"Вечный зов" төшөрөлгән күперҙе һүтәсәктәр

БР Башлығы Радий Хәбиров та "Инвестсәғәт"тә Белорет районы башлығы Владислав Мироновтан кеше йөрөү өсөн ҡулланылған ағас күперҙең яҙмышы тураһында ҡыҙыҡһынды. Ул ҡоролманы һүтеү тураһында ҡарар ҡабул ителеүен белдерҙе.

- Күперҙе тергеҙеп йәки ремонтлап булмай. Был эшкә бойондороҡһоҙ экспертиза ҡушыуҙан да файҙа юҡ. Беҙҙә яр буйы биләмәһен төҙөкләндереү буйынса концепция бар, уға күперҙе лә индерергә мөмкин. Был проектты финанслау мөмкинлеге буйынса тәҡдимдәр әҙерләйбеҙ, - тине ул.

Радий Фәрит улы күпер тирәһе биләмәһен төҙөкләндереү буйынса тәҡдимдәр индереүгә бер аҙна ваҡыт бирҙе.

Иҫегеҙгә төшөрәбеҙ - Белорет ҡалаһы янында быуа аша һалынған оҙон ағас күперҙе үткән быуаттың 30-сы йылдарында металлургия комбинаты төҙөгән һәм аҙаҡ тәртиптә тотҡан булған.

Оҙонлоғо 550 метрлыҡ күпер һуңынан хужаһыҙға әйләнгән. Һуңғы бер нисә йылда уның аша үтеүҙе тыйҙылар. Ремонтлау өсөн 30 миллион һум, емереү өсөн 4 миллион һум аҡса талап ителгәс, күперҙе бикләп ҡуйҙылар.