3 ғинуарҙа алкоголь һатмаҫҡа, 4-6 ғинуарҙа - сикләргә

Башҡортостанда йәшәүселәрҙе Яңы йыл каникулдарында республикала иҫерткес эсемлектәрҙе һатыуҙы сикләүгә ҡағылышлы закон проекты тураһында фекер алышыуға саҡыралар. Документ республика Дәүләт Йыйылышы – Ҡоролтайҙа әҙерләнгән.

«Закон проекты хәмер ҡулланыуҙың кире эҙемтәләрен кәметеүгә йүнәлтелгән һәм Яңы йыл каникулдарында алкоголь продукцияһын ваҡлап һатыуҙы сикләүҙе күҙ уңында тота», — тип билдәләнеләр республика Иҡтисади үҫеш министрлығының матбуғат хеҙмәтендә.

Проектҡа ярашлы, 3 ғинуарҙа алкоголь һатыу бөтөнләй тыйыла, ә 4-6 ғинуарҙа урындағы ваҡыт буйынса иртәнге сәғәт 10-дан көндөҙгө 2-гә тиклем генә һатыла.

Республика интернет-порталында закон проектының тексы менән танышырға һәм уны тикшереүҙә ҡатнашырға мөмкин.

«1 һәм 2 ғинуарҙа — байрам, бер нәмәне лә сикләмәйбеҙ. 3 ғинуар – тәнәфес: республикала алкоголь һатылмай. 4,5 һәм 6 ғинуарҙа ул иртәнге сәғәт 10-дан көндөҙгө 2-гә тиклем йәғни көндөң тәүге яртыһында ғына һатыла. 7 һәм 8 ғинуарҙа – барыһы ла ғәҙәти режимда», — тип хәбәр итте хөкүмәттәге оператив кәңәшмәлә республика башлығы хакимиәте етәксеһе Александр Сидякин. — Уҙған йылды анализлау күрһәтеүенсә, янғындар, иҫерек килеш төрлө хәлдәргә тарыу тап 4-5 ғинуарға тура килә. Оҙайлы ялдар бына шундай эҙемтәләргә килтерә».

Яңы йыл каникулдарында хәмер һатыуҙы сикләү тураһында закон проектын Ҡоролтайға ҡарауға «Берҙәм Рәсәй» депутаттары индерҙе.

21 октябрҙә «Башинформ» хәбәр иткәнсә, Яңы йыл байрамдарында эскелек проблемаһын Башҡортостан етәксеһе Радий Хәбиров күтәреп сыҡты.

«Беҙҙә ун көн каникул. Күп кенә ғаиләләр иҫ-аҡылын юйғансы эсә башлар. 31 декабрҙә шешәгә йәбешерҙәр, ә ғинуарҙа беҙ уларҙы «йыйырбыҙ». Криминаль хәл насарайыр, — тине ул. — Ошо ун көндә хәмер һатыу йәһәтенән аныҡ саралар күрергә әҙермен. Был сара популяр түгел, ләкин һабантуйҙарҙа, ҡайһы бер байрамдарҙа индергән тәжрибәбеҙ бының һөҙөмтәле булыуын күрһәтте. Әлбиттә, беҙ халыҡты бөтә байрамдарҙа ла алкоголһеҙ ҡалдырмаҫбыҙ, ләкин нисек дөрөҫ эш итеү тураһында уйларға тейешбеҙ».

http://www.bashinform.ru