Был тәҡдим V Бөтә донъя башҡорттары ҡоролтайында ла күтәрелде. 2016 йылдан башлап был көндә Бөтә донъя башҡорттары ҡоролтайы һәм Мәғариф министрлығы башланғысы менән республикала башҡорт телен һәм башҡорт халҡының мәҙәни ҡиммәттәрен һаҡлауға йүнәлтелгән саралар уҙғарыла. Хат авторҙары рәсми булмаған байрамды раҫлауҙы һорай. ЮНЕСКО-ның 2018 йылғы «Юғала барған телдәр» атласына ярашлы, башҡорт теленә юғалыу хәүефе янай. Рәсми рәүештә республиканың дәүләт теле булған башҡорт теле көнө булдырыу уны өйрәнеүҙе һәм файҙаланыуҙы тәьмин итеү туған телдең бәҫен күтәреүҙә һәм төбәк берҙәмлеген һаҡлауҙа мөһим аҙым булып тора», – тиелә мөрәжәғәттә.