Беҙҙең уҡытыусылар өҫтәмә 7700 һум аласаҡ

– Беҙҙең Һанлы үҫеш министрлығына мөрәжәғәт итәм. Һеҙ Мәғариф министрлығы менән был мәсьәләне бергә ҡарағыҙ. Берәй ерҙә был йәһәттән проблема бар икәнлеген күрһәгеҙ, хәҙер үк шөғөлләнегеҙ, 2021 йылда барыһы ла яҡшы булырға тейеш, – тине Радий Хәбиров Мөрәжәғәтнамәгә арналған видеоконференция барышында.

Балалар музыка мәктәптәрен һәм сәнғәт мәктәптәрен тәртипкә килтереү буйынса индерелгән тәҡдимдәр йәмғиәттә ыңғай ҡабул ителде. Президент әйтеүенсә, был мәктәптәргә капиталь ремонт яһар өсөн өҫтәмә рәүештә 22 миллиард һум аҡса бүленә.

– Класс етәкселәренә биш мең һумлыҡ өҫтәмә түләү индереү – бик мөһим норма. Әле беҙҙә класс етәксеһе уртаса ике мең һум тирәһе ала. Урал коэффициентын иҫәпләп, быға 5700 һумды ҡушабыҙ. Һөҙөмтәлә 7700 һум сыға, уҡытыусылар өсөн был өҫтәмә бик һәйбәт, – ти Радий Фәрит улы.

Мөрәжәғәтнамәлә юғары уҡыу йорттарына ҡағылған үҙгәрештәр тураһында ла һүҙ булды. Вуздарға, айырыуса төбәк юғары уҡыу йорттарына бюджет урындарын арттырыуға ҡағылды ул. “Квоталар буйынса эш башланғас, беҙгә бик иғтибарлы булыу кәрәк. Илдең башҡа төбәктәре менән сағыштырғанда, беҙ бюджет урындары һаны буйынса ныҡ артта ҡалабыҙ һәм ошоноң арҡаһында ауырлыҡтар кисерәбеҙ”, – тине төбәк етәксеһе был турала.