Дим биҫтәһендә урынлашҡан “Көньяҡ” баҙарында, Магистраль урамындағы “Перекресток” һәм Ухтомский районындағы “Магнит” супермаркеттарында тикшереү үткәрелеп, был объекттарҙа санитар-эпидемиологик талаптарҙың үтәлеүе билдәләнде.

Унан тыш, “СОЮЗ” сауҙа үҙәге лә (Дим баҙары) тикшерелде. Контроль саралары бүлеге етәксеһе Владимир Сайгак һөйләүенсә, битлек режимы бында үтәлә, тик барыбер бер ни тиклем етешһеҙлектәр теркәлгән. Мәҫәлән, павильондарға ингән ерҙәрҙә һатып алыусыларҙың тән температураһы үлсәнмәй. Ошо факт буйынса өс эшҡыуарға ҡарата административ хоҡуҡ боҙоу тураһында эш ҡуҙғатылған. Баҙар етешһеҙлектәр юҡҡа сығарылғансы ябыласаҡ.

Башҡортостан Башлығының 18 мартта ҡул ҡуйған “Юғары әҙерлек тураһында”ғы Указына ярашлы, министрлыҡ хеҙмәткәрҙәре хакимиәт вәкилдәре һәм хоҡуҡ һаҡсылары менән берлектә көн һайын талаптар үтәлешен тикшерә. Республикала битлек режимы башланғандан алып 1 ноябргә тиклем 59503 ойошмала тикшереү ойошторолған, уларҙа 511 етешһеҙлек асыҡланған.

shonkar.rbsmi.ru