Өфөлә яугирҙәр өсөн шәхси парадтар ойошторола

Өфөлә Еңеү парадына 100 һуғыш, хеҙмәт ветераны һәм Рәсәй Геройҙары саҡырылған. Баш ҡала вице-мэры Владимир Жебровский хәбәр итеүенсә, 9 майҙа тантаналы сарала ҡатнаша алмағандар өсөн май айында йорт эргәһендә шәхси парадтар ойошторола. Был хаҡта Башинформ мәғлүмәт агентлығы хәбәр итә.

«Майҙа Бөйөк Ватан һуғышы ветерандары «Ветеран өсөн такси» акцияһы барышында Яндекс-такси хеҙмәттәре менән бушлай файҙаланырға мөмкин. Республика халыҡты социаль хеҙмәтләндереү үҙәге менән берлектә «Ветеран яныбыҙҙа йәшәй» акцияһы үткәрелә – ул яңғыҙ йәшәгән һуғыш ветерандарының өйҙәрен, ихаталарын таҙартыу, башҡа ярҙам күрһәтеү», – тине баш ҡала хакимиәте башлығы урынбаҫары.

Ҡалала «Хәтер вахтаһы», «Георгий таҫмаһы», «Ветеранды шылтыратып ҡотлау», «Еңеү вальсы», «Еңеү тәҙрәләре», «Еңеү хаты» кеүек ватансылыҡ акциялары ойошторола.

8 майҙа Еңеү паркында «Еңеү» халыҡ флешмобы үткәрелә.

7 майҙан 8-енә тиклем «Башавтотранс» маршруттарында һуғыш йылдары йырҙары яңғырай, шулай уҡ 298-се ҡала маршрутында (Инорс – Дим) үҫмерҙәр клубтарының ижади коллективтары һуғыш осоро йырҙарын башҡара.

https://www.bashinform.ru