Өлкәндәр ниндәй льготаларға эйә?

70-те үткәндәргә

70 йәше тулған пенсионерҙар өсөн федераль кимәлдә махсус льготалар ҡаралмаған. Улар төбәк ҡануниәте менән генә билдәләнә ала.

Торлаҡ-коммуналь хужалыҡ өлкәһендәге төп льгота – ул капиталь ремонтҡа иғәнә түләүгә 50 процент ташлама. Ул яңғыҙ йәшәгән пенсионерҙарға бирелә. Шулай уҡ коммуналь хеҙмәттәр өсөн түләгәндә кәмендә 50 процент күләмендә компенсация гарантиялана. Рәсәй төбәктәре үҙҙәре лә компенсация төрҙәрен билдәләй ала.

Транспорт өлкәһендә 70-те үткән өлкәндәр ил субъекты ҡануниәте менән ҡаралған льгота­ларҙан файҙалана ала. Ундай­ҙарға бөтә төр ҡала транспортында (маршрут һәм ғәҙәти такси­ҙарҙан тыш), ҡала яны электричкаларында һәм автобустарында бушлай, социаль таксиҙа льготалы йөрөү инә.

Социаль тәьминәт

70 йәштән өлкәндәр ҡайһы саҡта үҙаллы хәрәкәт итә, үҙ-үҙен ҡарай алмай, шуға күрә дәүләт социаль тәьминәт сараларын гарантиялай. Өлкән­дәр хаҡында хәстәрлек күреүгә социаль хеҙмәт­кәрҙәр йәлеп ителә. Пенсионерҙың уны ҡа­рар­ға тейешле туғандары бул­һа, социаль тәьминәт пенсия иҫәбенә тормошҡа ашырыла.

80-де үткәндәргә

Был төркөмгә ингән кеше­ләр­гә түбәндәгеләр гарантиялана:

1. Страховка пенсияһының аныҡ билдәләнгән өлөшөн 100 процентҡа арттырыу (I группа инвалидтарынан тыш).
2. Өлкән йәштәге пенсионерҙы ҡараған өсөн айлыҡ түләү (уны ошо пенсионерҙың эшләмәгән туғаны йәки башҡа кешеһе алырға хоҡуҡлы).
3. Өлкән йәштәге кешене ҡарау менән бәйле түләүһеҙ медицина һәм социаль хеҙмәттәр.
4. Пенсионер яңғыҙ йәшәһә, капиталь ремонтҡа иғәнә түләүҙән азат итеү.

Ҡайҙа мөрәжәғәт итергә:

1. Рәсәй Пенсия фондының үҙегеҙ даими йәшәгән урындағы бүлексәһенә;
2. Үҙегеҙ даими йәшәгән төбәктәге халыҡты социаль яҡлау бүлегенә.
3. Пенсияны арттырыу өсөн Пенсия фондына айырым ғариза биреүҙең кәрәге юҡ, был автоматлаштырылған тәртиптә башҡарыла. Капиталь ремонтҡа иғәнәләрҙән бушатһындар өсөн социаль яҡлау органдарына мөрәжәғәт итергә кәрәк. Пенсионерҙы ҡарау буйынса түләү билдәләһендәр өсөн ул үҙе генә түгел, шулай уҡ ҡараусы кеше лә ғариза тапшырырға тейеш.

 https://bashgazet.ru