Алты көрәшсе — Европа чемпионы

Башҡортостан көрәшселәре Баҡыла Европа чемпионы титулын яуланы. Спортсыларыбыҙҙың халыҡ-ара кимәлдә еңеүе тураһында республиканың спорт министры Руслан Хәбибов хәбәр итте.

Азербайжанда ойошторолған ярыштарҙа 19 илдән спортсылар ҡатнашты. Башҡортостан көрәшселәре алты алтын, ике көмөш һәм бер бронза миҙалға лайыҡ булды.

«Башинформ» агентлығы асыҡлауынса, ир-егеттәр араһында — Рөстәм Зыяҡаев (100 килограмдан ашыу), Дмитрий Ларюков (68 килограмға тиклем) һәм Рәзил Шабиев (75 килограмға тиклем), ә ҡатын-ҡыҙҙар араһында Алёна Фәтихова (52 килограмм), Алина Пухова (66 килограмм) һәм Олимпия Махиянова (76 килограмм) Европа чемпионы исемен алды.

Илфаҡ Ибәтуллинда (57 килограмм) һәм Артур Зөлҡәрнәевта (82 килограмм) — көмөш миҙалдар. Виталий Балянов (100 килограмға тиклем) бронза миҙалға лайыҡ булды.

Әйткәндәй, быйыл июль айында Артур Зөлҡәрнәев Астанала билбау көрәше буйынса донъя чемпионатында ете тапҡыр донъя чемпионы исемен яуланы.

Башинформ.